Հայասանում բնածին արատներով ծնված նորածինների աճի միտում կա
![](https://168.am/wp-content/uploads/2012/08/-ֆոտո-e1344602643377.gif)
Հայաստանում թեև բնածին արատով երեխաների թիվն աճում է, այդուհանդերձ, Առողջապահության նախարարության (ԱՆ) մասնագետները հավաստիացնում են, որ ոչ թե բնածին արատներով նորածինների դեպքերն են շատացել, այլ` այդ արատների հայտնաբերման եղանակներն են Հայաստանի համար հասանելի դարձել:
ԱՆ Մոր և մանկան առողջության պահպանման վարչության պետ Կարինե Սարիբեկյանի հավաստամամբ` բնածին արատով ծնվող երեխաների դեպքերի թվի որոշակի տատանում կա: Օրինակ` 1995 թվականին գրանցվել է նման 300 դեպք, իսկ 2000 թվականից բնածին արատներով ծնվող երեխաների թիվը դարձել է 600: Այնուամենայնիվ, վերջին տարիներին նման դեպքերի թիվը տատանվում է 600-ի սահմաններում:
«Վերջին երեք տարիներին մի փոքր շատացել են: Բայց, երբ այդ թվերը դարձնում ենք ցուցանիշներ` որպես այդպիսին մենք աճ չունենք արձանագրված, քանի որ ընդամենը 1-2 պրոմիլեով տատանվում են: Միայն վերջին երեք տարիներին բնածին արատով ծնվող երեխաների աճի միտում կա»,- 168.am-ի հետ զրույցում ասաց Կ. Սարիբեկյանը: Նա նաև շեշտեց, որ Առողջապահության նախարարության ունեցած տվյալներով`այդ աճի հնարավոր կապը ախտորոշման բարելավմամբ է հիմնավորվում:
Եթե նախկինում կնոջ հղիության շրջանում երեխայի մոտ բնածին արատը հայտնաբերելը հնարավոր չէր, ապա այսօր բարելավված դիագնոստիկայի, զարգացած սարքավորումների, տեխնոլոգիաների շնորհիվ հնարավոր է դարձել հիվանդության ախտորոշումը: «Պատճառահետևանքային կապից հղում անել մենք այսօր դեռևս չենք կարող, որովհետև հետազոտություններ չունենք»:
Այդուհանդերձ, 2011 թվականի ընթացքում 1000 կենդանի ծնվածից 16.8 նորածիններ եղել են բնածին արատներով:
ԱՆ Մոր և մանկան առողջության պահպանման վարչության պետ Կարինե Սարիբեկյանը հավաստիացնում է, որ Հայաստանում անոմալ, մուտանտային ծնունդներ չեն գրանցվել: