Հայաստանը մեկ օրով նախագահելու է Արարատ Միրզոյանը

Պաշտոնական լրահոսից տեղեկանում ենք, որ այսօր վարչապետ Նիկոլ Փաշինյանի հետ միաժամանակ՝ մեկօրյա արձակուրդ է գնացել նաև ՀՀ նախագահ Արմեն Սարգսյանը:

Եվ ուշագրավ է հաջորդ զուգադիպությունը, որը 168.am-ին հայտնի դարձավ քիչ առաջ:

Պարզվում է՝ այսօր անսպասելի արձակուրդ է վերցրել նաև ՀՀ գլխավոր դատախազ Արթուր Դավթյանը, ընդ որում՝ դարձյալ մեկ օրով:

Նկատենք, եթե վարչապետն իր երկօրյա արձակուրդի մասին տեղեկացրել էր դեռ օրեր առաջ, ապա, մեղմ ասած, հասկանալի չէ, թե ինչո՞ւ է ՀՀ նախագահ Սարգսյանի մեկօրյա արձակուրդի մասին տեղեկատվությունը  նախագահի գրասենյակն այսօր հաղորդում, և միայն՝ նախագահի  մեկնելուց հետո:

Միևնույն օրը երեք բարձրաստիճան պաշտոնյաների արձակուրդ գնալու խորհրդավոր զուգադիպությունը  որոշ շրջանակների մոտ կասկածների լուրջ հիմքեր է ստեղծել:   Ավելին՝  վարկած կա, որ միևնույն օրով նախագահի և գլխավոր դատախազի անսպասելի բացակայությունը՝ թելադրված է եղել, ընտրվել է արձակուրդի մոտիվացիան:

Հակառակ դեպքում չկար տրամաբանություն, որ նախագահ Արմեն Սարգսյանը, ում վրա է դրվում երկրի պատասխանատվությունը՝ վարչապետի բացակայության շրջանում,  չպետք է սպասեր նրա վերադարձին, հետո նոր մեկներ հանգստի: Առավել ևս, որ խոսքն ընդամենը մեկօրյա հանգստի մասին է:

Ստացվում է՝ այնքան հրատապ խնդիր կա երկրի օրակարգում, որ նրանց այս՝ հանգստանալու «զուգադիպող» ցանկությունը,  իրականում ոչ այնքան հանգստի, «ռելաքսի»  նպատակով էր, որքան աշխատանքային ծանր քննարկումների:

Նշենք, որ երկրի երկու առաջին դեմքերի բացակայության շրջանում դե ֆակտո երկրի ղեկավար է համարվում օրենսդիր մարմնի ղեկավարը: Միայն այսօր՝ Հայաստանը մեկ օրով նախագահելու է ՀՀ ԱԺ նախագահ Արարատ Միրզոյանը:

Սյուզի Բադոյան