Հայտարարվել է աշխարհում զբոսաշրջությունից առավել մեծ կախվածություն ունեցող քաղաքը
Զբոսաշրջության եւ ճանապարհորդությունների համաշխարհային խորհրդի (WTTC) զեկույցում Մեքսիկայի Կանկուն քաղաքը ներկայացված է որպես զբոսաշրջությունից առավել մեծ կախվածություն ունեցող քաղաքը, քանի որ հենց այդ ճյուղն է ապահովում նրա համախառն ներքին արդյունքի գրեթե կեսը՝ 49,6 տոկոսը: Այդ մասին հայտնել է Lonelyplanet-ը:
Կանկունը մինչեւ 1972 թվականը ձկնորսներով բնակեցված սովորական գյուղ էր, որը վերածեցին ժողովրդականություն վայելող առողջարանի: Այժմ այնտեղ օտարերկրյա զբոսաշրջիկների 63 տոկոսը ԱՄՆ-ի քաղաքացիներն են:
WTTC-ի ցուցակի երկրորդ տեղում Մարաքեշն է (30,2 տոկոս):
Օտարերկրյա զբոսաշրջիկների երրորդ մասն այնտեղ ֆրանսիացիներն են: Վարկանիշի երրորդ տեղում Մակաոն է: Այնտեղ տուրիստական ճյուղից եկամուտները կազմում են ՀՆԱ-ի 29,3 տոկոսը:
Զբոսաշրջությունից առավել մեծ կախվածություն ունեցող քաղաքների հնգյակում տեղ են գտել ԱՄՆ-ի Օռլանդոն (ՀՆԱ-ի 18,7 տոկոսը) եւ թուրքական Անթալիան (17,6 տոկոս):
Զբոսաշրջությունից կախվածություն ունեցող քաղաքների թոփ-10-ում հայտնվել են նաեւ Վենետիկը, Դուբրովնիկը, Դուբայը, Լաս-Վեգասը եւ Բանգկոկը, հաղորդել է ՌԻԱ Նովոստին:
