Արդյոք գազին օդ խառնվո՞ւմ է. պարզաբանում է «Գազպրոմ Արմենիա» ՓԲԸ Վարչության նախագահ- գլխավոր տնօրենը
«Գազի հետ օդ խառնելու այս պատմությունը տարիների խնդիր է, բայց գազի հետ օդ խառնելը պայթյունավտանգ է»,- այսօր ԱԺ գազի և էլեկտրաէներգիայի հարցով ԱԺ քննիչ հանձնաժողովի նիստում հայտարարեց «Գազպրոմ Արմենիա» ՓԲԸ Վարչության նախագահ- գլխավոր տնօրեն Հրանտ Թադևոսյանը՝ պատասխանելով «Ելք» խմբակցության պատգամավոր Հովիկ Աղազարյանի հարցին, թե արդյոք գազին օդ խառնվո՞ւմ է:
Ըստ Թադևոսյանի՝ գազի հետ օդ, ազոտ կամ այլ մասնիկ խառնելու գաղափարը հանգում է կալորիականությանը: Նա հարցադրում արեց՝ ինչպիսի՞ կալորիականությամբ գազ է ուզում ՀՀ սպառողը:
«Ինձ կբավարարի այն կալորիականությունը, որ դուք ստանում եք սահմանին»,- պատասխանեց Հ.Աղազարյանը:
Հ.Թադևոսյանը նշեց, որ Հայաստանում, բացի «Գազպրոմ Արմենիայի» լաբորատորիայից, գործում են այլ լաբորատորիաներ ևս, որոնք երբևէ որևէ «պրիտենզիա» չեն ներկայացրել.
«Այս խնդիրը ծագել է, որ ինչ-որ մեկը սուրճը մի քիչ ավելի երկար է եփել: Զազը ստանում ենք Ռուսաստանի Դաշնությունից, անցնում է Վրաստանով, ոչ մի բան չի խառնվում, կալորիականությունը չափվում է մուտքի մոտ և տեղամասերում: Կախված ճնշումներից և թե որտեղից է գազը, կալորիականությունը տատանվում է 8100-8900 կկալ խմ համար»:
Ընդ որում, նրա խոսքով, իրանական գազի կալորիականությունը մինչև 8000 կկալ է 1 խմ համար, այսինքն՝ մոտ 1000 կկալ պակաս է ռուսականից:
Հ.Թադևոսյանը նշեց, որ Հայաստանն այսօր Իրանից գազ չի գնում, բայց եթե ռուսական գազը 150 դոլար է, իրանականը պետք է լինի 130 դոլար, որպեսզի համադրելի լինի»:
Անդրադառնալով սպասարկման վարձի վերացման խնդրին՝ ընկերության ղեկավարը նշեց, որ դա անվտանգության առումով խնդիրներ կհարուցի. «Սա ծառայություն է, որի համար պետք է վճարել: Ստեղծված վիճակը լավագույնն է, գները նվազագույնն են»:
Ամեն դեպքում, ինչպես նկատեց Հ.Թադևոսյանը, եթե կա ընկերություն, որն ավելի էժան կմատուցի սպասարկման ծառայությունը, «Գազպրոմ Արմենիան» կհամաձայնի.
«Ամենակարևոր խնդիրը բնակչության անվտանգությունն է: «Գազպրոմ Արմենիան» ոչ մի շահագրգռվածություն չունի այս ծառայությունն իրականացնելու համար»:
