Իսրայելը ևս մեկ քայլ կատարեց տակտիկական հրթիռների ստորաբաժանման ստեղծման ծրագրի գործում
Իսրայելի պաշտպանության նախարարությունը պայմանագիր է ստորագրել «Իսրայելի ռազմարդյունաբերություն» (IMI Systems) կոնցեռնի հետ արդիական հրթիռային սպառազինությունների ձեռքբերման վերաբերյալ։ Գործարքի ընդհանուր արժեքը հաշվվում է մի քանի հարյուր մլն շեկել։
Երկրի Պաշտպանության նախարարության հաղորդագրության համաձայն՝ հրթիռային նոր համակարգերը կկարողանան էապես ընդլայնել Իսրայելի պաշտպանության բանակի (ՑԱՀԱԼ) ռազմատեխնիկական պոտենցիալը։ Մասնավորապես խոսվում է թիրախների խոցման առավել ճշգրիտ ու արագ արձագանքման հնարավորությունների ընդլայնման մասին։ Նոր հրթիռային համակարգերը նախատեսվում է արտադրել առաջատար տեխնոլոգիաներով՝ ներկայիս մարտական պայմաններին առավելագույնս հեշտ և արագ ադապտացվելու նպատակով։
Հիշեցնենք, որ այս պայմանագրի ստորագրումն ուղղակիորեն պայմանավորված է Իսրայելի ռազմաքաղաքական ղեկավարության այն որոշմամբ, որի համաձայն՝ նախատեսվում է Իսրայելի պաշտպանության բանակը համալրել տարբեր հեռահարության ճշգրիտ հրթիռային համակարգերով, որոնք հնարավորություն կտան խոցել տարածաշրջանում տեղակայված ցանկացած թիրախ։
Պատրաստեց 168.am-ը
