Կառավարությունը 675 միլիոն դրամի պարտավորությունից կազատի Սուքիասյաններին պատկանող ընկերությանը. «Առավոտ»
Կառավարությունը Սուքիասյաններին պատկանող «ՄԵԳԱ ՓՐՈԴԱՔՇՆ» ՍՊ ընկերությանը նախատեսում է տրամադրել ներմուծման մաքսատուրքից ազատելու արտոնություն։ Ընկերությանը մոտ 675 միլիոն դրամի մաքսատուրք վճարելու պարտավորությունից ազատելու նախագիծը կառավարության այսօրվա չզեկուցվող հարցերի մեջ է: Այս մասին տեղեկանում ենք «Առավոտ»-ից:
Նախագծի հիմնավորման մեջ նշված է, որ «ՄԵԳԱ ՓՐՈԴԱՔՇՆ»-ը նախատեսում է նավթավերամշակման ոլորտում իրականացնել շուրջ 13.5 մլրդ դրամի ներդրումային ծրագիր։
Ծրագրի շրջանակում ընկերությունը նախատեսում է հումքի ձեռքբերում և նավթամթերքների արտադրության զարգացում՝ կիրառելով ժամանակակից տեխնոլոգիաներ և բարձր արտադրողականությամբ սարքավորումներ։
Ծրագիրն իրականացվելու է Արարատի մարզում։ «ՄԵԳԱ ՓՐՈԴԱՔՇՆ»-ը հիմնադրվել է 1998 թվականին և ներկայումս ունի 55 աշխատակից՝ շուրջ 560 հազար դրամ միջին ամսական աշխատավարձով։ Մինչև 2027 թվականը նախատեսվում է աշխատատեղերի թիվը հասցնել 60-ի։
Ներդրումային ծրագրի շրջանակում ներմուծվող ապրանքների ընդհանուր արժեքը կազմում է 13.5 մլրդ դրամ, իսկ դրանց ներմուծման մաքսատուրքից ազատման արտոնության գնահատված չափը՝ 675 մլն դրամ։
Ընկերության ներկայացրած հայտը բավարարելու դեպքում արտոնությունը կնպաստի Հայաստանում նավթավերամշակման արտադրության զարգացմանը, ներդրումների ներգրավմանը, տեղական արտադրության և արտահանման խթանմանը, ինչպես նաև նոր աշխատատեղերի ստեղծմանը։
Նշվում է, որ ներմուծվող ապրանքները չեն ձեռք բերվում ԵԱՏՄ անդամ երկրներից, քանի որ չեն համապատասխանում ընկերության տեխնիկական պահանջներին։
Նախագիծը, ըստ հիմնավորման, բխում է ՀՀ կառավարության 2021-2026 թվականների ծրագրի «Մշակող արդյունաբերություն» ուղղությունից։
Քիչ առաջ Խաչատուր Սուքիասյանի մամուլի խոսնակ Աննա Մկրտչյանը ֆեյսբուքյան իր էջում հայտարարություն է տարածել, որով հերքել է «Առավոտ»-ի տարածած լուրը և հայտնել է, որ Սուքիասյանների ընտանիքը ոչ մի առնչություն չունի արտոնություն ստացած «ՄԵԳԱ ՓՐՈԴԱՔՇՆ» ՍՊ ընկերության հետ:
«Aravot.am-ը կեղծ լուր է տարածել այն մասին, որ Կառավարությունը 675 միլիոն դրամի պարտավորությունից կազատի Սուքիասյաններին պատկանող ընկերությանը։ Հայտնում եմ, որ Սուքիասյանների ընտանիքը ոչ մի առնչություն չունի արտոնություն ստացած «ՄԵԳԱ ՓՐՈԴԱՔՇՆ» ՍՊ ընկերության հետ։
Լուրը կեղծ է և չի համապատասխանում իրականությանը։
Aravot.am-ից բացի՝ կեղծ լուրը տարածել են նաև մի շարք այլ լրատվամիջոցներ»,- ասվում է խոսնակի հայտարարության մեջ:
