Արքայազն Հարրին և Մեգանը մտադիր են վերադառնալ Մեծ Բրիտանիա
Սասեքսի դուքս, արքայազն Հարրին ու նրա կինը՝ Մեգան Մարքլը, պլանավորում են վերադառնալ Մեծ Բրիտանիա՝ թագավորական պարտականություններից հրաժարվելուց և Միացյալ Նահանգներ տեղափոխվելուց վեց տարի անց։ Այս մասին հաղորդում է BBC-ն։
Նրանք մտադիր են օգոստոսի վերջին Կալիֆոռնիայից տեղափոխվել Մեծ Բրիտանիա՝ Լոնդոնից դուրս գտնվող մասնավոր, այլ ոչ թե թագավորական, բնակավայր։
Նրանց երեխաները՝ յոթամյա արքայազն Արչին և հնգամյա արքայադուստր Լիլիբեթը, սեպտեմբերին պետք է սկսեն ուսումը բրիտանական դպրոցում։
Թագավոր Չարլզ III-ը որդու և նրա ընտանիքի տեղափոխման ծրագրերի մասին տեղեկացվել է օգոստոսի 16‑ին։ Ներկայում արքայազն Հարրին կամ Մեգանը չեն պատրաստվում վերադառնալ իրենց թագավորական պարտականություններին։
Արքայազն Հարրիի խոսնակը և Բուքինգհեմյան պալատը դեռևս մեկնաբանություններ չեն տվել հարցի առնչությամբ։
Reuters-ի փոխանցմամբ՝ զույգին մոտ կանգնած աղբյուրը հաստատել է տեղեկությունները։ Սասեքսի դուքսն ու դքսուհին և նրանց երեխաները հուլիսին այցելել էին թագավորին, սակայն, ըստ տեղեկությունների, նրանց տեղափոխության վերաբերյալ հարցը չի քննարկվել։
