Տիգրան Համբարձումյանը հաղթանակ է տարել աշխարհում ամենաբարձր վարկանիշ ունեցող Մագնուս Կարլսենի նկատմամբ
14-ամյա ՖԻԴԵ-ի վարպետ Տիգրան Համբարձումյանը օգոստոսի 18-ին կայացած Titled Tuesday առցանց մրցաշարում հաղթանակ է տարել աշխարհում ամենաբարձր վարկանիշ ունեցող Մագնուս Կարլսենի նկատմամբ։ Այս մասին հայտնում են Հայաստանի շախմատի ֆեդերացիայից։
35-ամյա Կարլսենը շարունակում է մնալ աշխարհի ամենաբարձր վարկանիշ ունեցող շախմատիստը բոլոր երեք ձևաչափերում։ Նա դասական շախմատի աշխարհի հնգակի չեմպիոն է, ով ինքնակամ հրաժարվեց տիտղոսից՝ նախընտրելով չպաշտպանել այն։ Համբարձումյանը հաղթեց նրան Կարլսենի՝ Փարիզում Esports World Cup-ի չեմպիոնական տիտղոսը պահպանելուց ընդամենը մեկ օր անց․ այդ մրցաշարում Կարլսենն անցել էր առանց որևէ պարտության և արժանացել 250,000 դոլար գլխավոր մրցանակին։
Պատանի շախմատիստն իր անունը կերտում է հայկական և եվրոպական պատանեկան շախմատում։ 2025 թվականի Եվրոպայի պատանեկան չեմպիոնատում նա արծաթե մեդալ էր նվաճել Մ14 (մինչև 14 տարեկանների) խմբում, իսկ նույն առաջնության կայծակնային շախմատի (բլից) մրցաշարում դարձել էր ոսկե մեդալակիր։ Նա մարզվում է Հայաստանի շախմատի ակադեմիայում՝ գրոսմայստեր Տիգրան Հարությունյանի ղեկավարությամբ։
Այս արդյունքը լրացնում է Կարլսենի նկատմամբ հայ շախմատիստների հաղթանակների շարքը։ Հունիսին Հոնկոնգում կայացած ՖԻԴԵ-ի արագ շախմատի (ռապիդ) աշխարհի թիմային առաջնությունում նրան հաղթել էր գրոսմայստեր Շանթ Սարգսյանը, իսկ անցյալ տարեվերջին ՖԻԴԵ-ի բլիցի աշխարհի առաջնությունում Կարլսենին պարտության էր մատնել գրոսմայստեր Հայկ Մարտիրոսյանը։ Հիշեցնենք նաև, որ Լևոն Արոնյանը ևս իր կարիերայի ընթացքում բազմիցս է հաղթել Կարլսենին։
