Քլինթոնը Թրամփի ոսկեզօծ Սպիտակ տունը համեմատել է Սադամ Հուսեյնի պալատների հետ
ԱՄՆ նախկին պետքարտուղար Հիլարի Քլինթոնը Դոնալդ Թրամփի կողմից թարմացված Սպիտակ տան ինտերիերը համեմատել է Իրաքի նախկին նախագահ Սադամ Հուսեյնի պալատների հետ։ Kara Swisher-ի փոդքաստի հարցազրույցում ԱՄՆ նախկին պետքարտուղարը քննադատել է Օվալաձև աշխատասենյակում և նախագահական նստավայրի այլ հատվածներում ոսկե դեկորի օգտագործումը։
Քլինթոնի խոսքով՝ ոսկե տարրերի առատությունը, նրա կարծիքով, արտացոլում է Թրամփի «նարցիսական անձնավորությունը» և մշտապես սեփական նշանակությունն ընդգծելու նրա ձգտումը։
«Տխուր է. տխուր է, որ ամեն ինչ դարձել է այսքան անճաշակ»,- ասել է Քլինթոնը՝ հավելելով, որ Սպիտակ տան ինտերիերն իրեն հիշեցնում է Սադամ Հուսեյնի պալատները։
Նա նաև կատակել է, որ այժմ Թրամփին ավելի շատ հետաքրքրում է այն հարցը, թե «որտեղ կարելի է էլ ավելի շատ ոսկի ավելացնել», քան Իրանի հետ պատերազմից դուրս գալու այնպիսի լուծում գտնելը, որը թույլ կտա նրան խուսափել քաղաքական կորուստներից։
Քլինթոնն առանձին քննադատել է նաև Սպիտակ տան համալիրում իրականացվող լայնածավալ փոփոխությունները։ Այն բանից հետո, երբ սկսվել է Արևելյան թևի ապամոնտաժումը՝ Թրամփի առաջարկած պարահանդեսային սրահի կառուցման համար, նա հայտնել է, որ նախագահը քանդում է մի շենք, որը պատկանում է ոչ թե իրեն, այլ ամերիկյան ժողովրդին։
Նրա խոսքով՝ հաջորդ նախագահը ստիպված կլինի որոշել, թե ինչ անի անավարտ պարահանդեսային սրահի հետ։ Քլինթոնը նախագիծն անվանել է «Սպիտակ տան կողքին առաջացած ուռուցք»։
Միևնույն ժամանակ, Քլինթոնն է, լինելով առաջին տիկին, ղեկավարել Սպիտակ տան Կապույտ սենյակի վերակառուցումը։
2025 թվականին Սպիտակ տուն վերադառնալուց հետո Թրամփը սկսել է շենքի ինտերիերի լայնածավալ փոփոխություններ, այդ թվում՝ ոսկե տարրեր ավելացնելով Օվալաձև աշխատասենյակում և Արևմտյան թևի այլ հատվածներում։
Անցյալ տարվա դեկտեմբերին նա նաև ներկայացրել է «Նախագահական փառքի ծառուղին»՝ Վարդերի այգու սյունաշարի երկայնքով։ Այնտեղ տեղադրված ցուցատախտակներին հայտնվել են Թրամփի նախորդների հասցեին ուղղված խայթող քաղաքական մեկնաբանություններ։ Սպիտակ տան մամուլի քարտուղար Քերոլայն Լիվիթը հայտնել էր, որ նախագահը դրանք գրել է անձամբ։
Սպիտակ տան ներկայացուցիչ Դևիս Ինգլը, պատասխանելով Քլինթոնի խոսքերին, հիշեցրել է 2016 թվականի նախագահական ընտրությունների մասին, որոնցում նա պարտվել էր Թրամփին։ Նրա խոսքով՝ Քլինթոնը երբեք հնարավորություն չի ստացել ինքնուրույն ձևավորել Օվալաձև աշխատասենյակը, քանի որ Թրամփից «նվաստացուցիչ պարտություն» է կրել և չի կարողացել հաշտվել դրա հետ։
Հարցազրույցում Քլինթոնը նաև կատակով առաջարկել է Թրամփի հեռանալուց հետո իրեն նշանակել «ոսկին հանելու նախարար», որպեսզի Սպիտակ տնից հեռացնի ավելորդ դեկորը և կարգի բերի այն։
