Ալիևի խոսնակ Թոֆիգ Զուլֆուգարովը, որը հայտնի է ՀՀ տարածքային ամբողջականությունը թիրախավորող իր ելույթներով, առանձնահատուկ ոգևորվել է և մեդիա դաշտում Հայաստանի հասցեին սկսել է հնչեցնել սպառնալից տեքստեր․ Տաթևիկ Հայրապետյան
Ադրբեջանագետ Տաթևիկ Հայրապետյանը գրել է․
«Ադրբեջանի նախկին արտգործնախարար, Ալիևի կարկառուն քարոզիչ ու խոսնակ Թոֆիգ Զուլֆուգարովը, որը հայտնի է Հայաստանի Հանրապետության տարածքային ամբողջականությունը թիրախավորող իր ելույթներով և սպառնալիքներով, առանձնահատուկ ոգևորվել է և ադրբեջանական մեդիա դաշտում Հայաստանի հասցեին սկսել է հնչեցնել սպառնալից տեքստեր՝ վերջերս Պետքարտուղարության կողմից Հայաստանով անցնող «Թրամփի երթուղու»՝ TRIPP+ առևտրային հիմնադրամի ղեկավարի պաշտոնում Կոնստանտին Սոկոլովի նշանակումից հետո… Նա անգամ մոտ մեկ շաբաթ առաջ գրառում էր արել՝ առաջարկելով ընդհուպ մինչև ռազմական քայլեր, ինչը օգոստոսի 8-ից հետո չէր հնչել ադրբեջանական կողմից։
Ես իմ վերջին հարցազրույցում խոսել էի այս թեմայի մասին և ասել, որ ադրբեջանական կողմն անթաքույց սկսել է դժգոհություն արտահայտել այս թեմայով։ Սա դեռևս մնում է քարոզչության մակարդակում, քանի դեռ ԱՄՆ ղեկավարությունը կասեցնում է ադրբեջանական ախորժակը, բայց, ցավոք, երկարաժամկետ զսպման համար պետք է պետական շահը սպասարկող իշխանություն, որը կհասկանա, թե ինչ ասել է խաղաղություն, և ինչ ասել է ադրբեջանական ախորժակի զսպում…
Նման ղեկավարություն ունենալու դեպքում TRIPP-ը կլիներ զուտ հայ-ամերիկյան ծրագիր, քանի որ Ադրբեջանն անելիք չունի մեր տարածքի հետ, որի մի հատ էլ թուղթ ստորագրեր այս թեմայով»։
