ԱՄՆ-ն Ուկրաինային Patriot ՀՕՊ համակարգերի արտադրության արտոնագիր կտրամադրի. Թրամփ
ԱՄՆ նախագահ Դոնալդ Թրամփը չորեքշաբթի հայտարարել է, որ Վաշինգտոնը Ուկրաինային Patriot հակաօդային պաշտպանության համակարգերի արտադրության արտոնագիր կտրամադրի՝ օգնելու համար նրան դիմակայելու ռուսական հրթիռային հարձակումներին, հաղորդում է Associated Press-ը:
Ըստ նրա՝ ԱՄՆ-ը միաժամանակ ցույց կտա Ուկրաինային, թե ինչպես արտադրել այդ համակարգերը:
«Մենք նրանց Patriot արտադրելու իրավունք կտանք։ Մենք նրանց ցույց կտանք, թե ինչպես դա անել»,- Թուրքիայում ՆԱՏՕ-ի գագաթնաժողովի շրջանակում Ուկրաինայի նախագահ Վլադիմիր Զելենսկու հետ հանդիպման ժամանակ հայտարարել է Թրամփը: Նա նշել է, որ Ուկրաինան կկարողանա բավականին արագ կազմակերպել դրանց արտադրությունը:
Patriot համակարգերը թանկարժեք են, ունեն մեծ պահանջարկ, իսկ դրանց արտադրությունը երկար ժամանակ է խլում: Զելենսկին մի քանի տարի շարունակ խնդրում էր Ուկրաինային տրամադրել ավելի շատ նման համալիրներ, իսկ վերջին շրջանում նաև ձգտում էր ստանալ արտոնագիր՝ այդ համակարգերը սեփական ուժերով թողարկելու համար:
Թրամփի և Զելենսկու հանդիպումը տարաձայնություններով ավարտված նրանց նախորդ բանակցությունների համեմատ անցել է ավելի ջերմ մթնոլորտում: ԱՄՆ նախագահը դրական է գնահատել ուկրաինացի առաջնորդի պատրաստակամությունը՝ աշխատելու մարտական գործողությունների դադարեցման մասին համաձայնագրի շուրջ, նշում է գործակալությունը:
Թրամփը հայտարարել է, որ Զելենսկին «անհավանական աշխատանք է կատարել» և «շատ արդյունավետ» է եղել պատերազմի ընթացքում: ԱՄՆ նախագահի բնորոշմամբ՝ նրանց միջև հարաբերությունները զգալիորեն բարելավվել են, և ինքը կարծում է, որ հակամարտության ավարտի մասին համաձայնագիրը տեսանելի հեռանկարում է: Թրամփը հայտնել է նաև, որ Վաշինգտոնն աշխատելու է Ուկրաինայի համար «անվտանգության երաշխիքների որոշակի փաթեթի» շուրջ:
