Սենատոր Լինդսի Գրեմը Թրամփին կոչ է արել Իրանի հետ բանակցություններում կոշտ դիրքորոշում որդեգրել
Հանրապետական սենատոր Լինդսի Գրեմը X սոցիալական ցանցում ԱՄՆ նախագահ Դոնալդ Թրամփին կոչ է արել Իրանի հետ բանակցություններում կոշտ դիրքորոշում որդեգրել և ձգտել, այսպես կոչված, «Աբրահամյան համաձայնագրերի» ընդլայնմանը դեպի Մերձավոր Արևելքի երկրներ։
Գրեմը հայտարարել է, որ Թրամփը պետք է «ամուր կանգնի իր դիրքերում» Թեհրանի հետ հնարավոր համաձայնագիր կնքելիս, ինչպես նաև պնդի Սաուդյան Արաբիայի և տարածաշրջանի այլ պետությունների միանալը Աբրահամյան համաձայնագրերին։
Սենատորի կարծիքով, եթե ներկայիս բանակցությունների արդյունքում ԱՄՆ-ի դաշնակիցները Մերձավոր Արևելքում համաձայնեն միանալ այդ համաձայնագրերին, դա կդառնա «տարածաշրջանի նորագույն պատմության ամենանշանակալի իրադարձություններից մեկը»։
Գրեմն առանձին ընդգծել է, որ Սաուդյան Արաբիայի, Կատարի և Պակիստանի հնարավոր միացումը համաձայնագրերին «արմատապես կփոխի իրավիճակը Մերձավոր Արևելքում և աշխարհում»։
Ավելի վաղ՝ կիրակի օրը, Թրամփը շնորհակալություն էր հայտնել տարածաշրջանի երկրներին Իրանի հետ համաձայնության հասնելու ջանքերին աջակցելու համար և հայտարարել էր, որ համագործակցությունը «լրացուցիչ կամրապնդվի» Աբրահամյան համաձայնագրերի ընդլայնման միջոցով։
Այս կապակցությամբ Գրեմը փաստացի նախազգուշացրել է Մերձավոր Արևելքի երկրներին Վաշինգտոնի նախաձեռնությանը չաջակցելու հետևանքների մասին։ Ըստ նրա, եթե ԱՄՆ-ի դաշնակիցները չհամաձայնեն գնալ Թրամփի առաջարկած ճանապարհով, դա «լրջորեն կազդի ապագա հարաբերությունների վրա» Միացյալ Նահանգների հետ և ներկայիս խաղաղության ծրագիրը կդարձնի անընդունելի։
