Թուրքիան եկամուտների անհավասարությամբ հատել է վտանգավոր շեմը Եվրոպայում
Եվրոպայում հարուստների խավը, որը կազմում է բնակչության 0.1 տոկոսը, ստանում է երկրներում գրանցված ընդհանուր եկամտի շուրջ 4.5%-ը: Սակայն եկամուտների բաշխվածության ցուցանիշները տարբեր երկրներում այլ են։ Այս մասին տեղեկացնում է ermenihaber.am-ը։
Փորձագետների գնահատմամբ՝ այս տարբերությունների հիմնական պատճառները հարկային համակարգերն ու աշխատավարձերի անհավասարությունն են։ Հարուստների եկամտի մասնաբաժինն օրինակ Նիդերլանդներում կազմում է ընդամենը 1.6%, մինչդեռ Վրաստանում այն հասնում է ռեկորդային 10.2%-ի:
«Euronews»-ի փոխանցմամբ՝ «World Inequality Database»-ի տվյալները փաստում են, որ եկամուտների անհավասարության խորացման ֆոնին Թուրքիան ևս դասվել է ամենաբարձր ցուցանիշ ունեցող երկրների շարքին։
Եվրամիության (ԵՄ) տարածքում ամենաբարձր ցուցանիշը գրանցվել է Էստոնիայում (8.3%), որին հաջորդում են Բուլղարիան (7.5%) և Լեհաստանը (7%), իսկ արդեն ԵՄ անդամակցության թեկնածու երկրներից 2-ը՝ Թուրքիան և Սերբիան, անցել են վտանգավոր համարվող 6%-անոց շեմը. Սերբիայում այս ցուցանիշը կազմում է 6.9%, իսկ Թուրքիայում՝ 6.1%:
