Հորմուզի նեղուցով անխոչընդոտ անցումը կորցրել է իր իմաստը Իրանի վրա հարձակումից հետո. Բաղայի
Հորմուզի նեղուցով «անխոչընդոտ անցումը» կորցրել է իր իմաստը Իրանի վրա հարձակումից հետո, հայտարարել է Իրանի ԱԳՆ պաշտոնական ներկայացուցիչ Էսմայիլ Բաղային, հայտնում է Fars-ը:
Ըստ Բաղայիի, Հորմուզի նեղուցով «անխոչընդոտ անցման» հասկացությունը փաստացի կորցրել է իր նշանակությունն այն պահից, երբ այդ նեղուցի տարածքում գտնվող ԱՄՆ ռազմակայաններն ու օբյեկտներն օգտագործվեցին Իրանի դեմ ագրեսիվ ռազմական գործողություններ իրականացնելու համար:
Նա հավելել է, որ ստեղծված իրավիճակում, անկասկած, մեղավոր է Միացյալ Նահանգները:
Ավելի վաղ Իրանը հայտարարել էր Հորմուզի նեղուցը կրկին փակելու մասին՝ վկայակոչելով ԱՄՆ-ի կողմից իրականացված բազմաթիվ խախտումները:
Հորմուզի նեղուցում պայմաններն այլևս երբեք չեն վերադառնա նախապատերազմյան վիճակին, ավելի ուշ հայտարարել է Իրանի ազգային անվտանգության հանձնաժողովի անդամ Բորուջերդին:
Հորմուզի նեղուցով անցնելու համար վճարը ռիալով գանձելը դիտարկվում է որպես գերակա դիրքորոշում՝ ազգային արժույթն ամրապնդելու նպատակով, և Կենտրոնական բանկը պետք է հաստատի թվային ռիալն ու այն դնի դրամական շրջանառության մեջ, հավելել է նա:
