Դիմել ենք ԵՄ-ին՝ խաղաղության աջակցության համար, 3-րդ աջակցությունը 20 մլն եվրո է. Արարատ Միրզոյան
Հայաստանը Եվրամիության Խաղաղության հիմնադրամին է դիմել աջակցության երրորդ ծրագրի համար։ ԱԺ արտաքին հարաբերությունների հանձնաժողովի նիստում այս մասին հայտնեց ՀՀ արտգործնախարար Արարատ Միրզոյանը։
«Եվրոպական խաղաղության գործիքի ներքո ՀՀ-ն ստացավ աջակցության երկրորդ տրամադրումը։ Մենք արդեն երրորդի համար ենք դիմել»,- ասաց Միրզոյանը։
Նշենք, որ Հայաստանն առաջին ծրագրի շրջանակում ստացել էր 10 միլիոն եվրո, երկրորդի դեպքում՝ 20 միլիոն եվրո աջակցություն։
ՀՀ արտաքին քաղաքական գերատեսչության ղեկավարի խոսքով՝ ԵՄ-ի հետ ընդլայնվել է համագործակցությունը պաշտպանական և անվտանգության ոլորտներում, տրվել է անվտանգության և պաշտպանության վերաբերյալ խորհրդակցությունների մեկնարկ և այլն։
Միրզոյանը նաև հիշեցրեց, որ ստորագրվել է և ուժի մեջ է մտել «Հայաստան-Եվրոպական միության ճգնաժամային կառավարման գործողություններում ՀՀ-ի մասնակցության շրջանակը սահմանելու մասին» համաձայնագիրը։ Սա նշանակում է, որ Հայաստանը կարող է մասնակցել ԵՄ տարբեր քաղաքացիական առաքելություններին։
Հիշեցնենք, որ մայիսին սպասվում է եվրոպական քաղաքական համայնքի գագաթաժողովը, ինչպես նաև տեղի կունենա Հայաստան-Եվրոպական միություն առաջին գագաթաժողովը։
