ԱԷՄԳ-ն հայտարարել է Իրանի միջուկային օբյեկտներում ստուգումները վերսկսելու մասին
Ատոմային էներգիայի միջազգային գործակալությունը հայտարարել է, որ վերսկսել է ստուգումները Իրանի միջուկային օբյեկտներում։ Այս մասին գրում է Al-Mayadeen-ը։
Նշվում է, որ ստուգումներն անցկացվում են գաղտնի ռեժիմով. «Մենք չենք կարող բացահայտել ստուգված վայրերը, բայց կարող ենք հաստատել, որ դրանք այս շաբաթ անցկացվել են։
2025 թվականի սեպտեմբերի 9-ին Իրանի արտաքին գործերի նախարար Աբբաս Արաղչին և ԱԷՄԳ-ի գլխավոր տնօրեն Ռաֆայել Գրոսին Կահիրեում համաձայնագիր են ստորագրել միջուկային համագործակցությունը նոր շրջանակներում վերսկսելու վերաբերյալ։ Նշվում է, որ ԱԷՄԳ-ի հետ վերջերս կնքված համաձայնագիրը նշանակալի քայլ է վստահությունը վերականգնելու և միջուկային ոլորտում համագործակցությունը վերսկսելու գործում։
Համաձայնագիրն Արաղչիի և Գրոսիի միջև ստորագրվել է Կահիրեում երեք ժամ տևած հանդիպման ժամանակ։ Իրանը և ԱԷՄԳ-ն նախկինում Վիեննայում և Թեհրանում անցկացրել էին բանակցությունների երեք փուլ՝ փորձելով գտնել առաջ շարժվելու գործնական ուղի։
ՄԱԿ-ի միջուկային գործակալության ղեկավարը նոր համաձայնագիրը որակել է որպես «կարևոր քայլ ճիշտ ուղղությամբ»։
