Առանց ուղիղ եռակողմ հանդիպման ռուս-ուկրաինական հակամարտությունը չի ավարտվի. Պոդոլյակ
Ռուս-ուկրաինական հակամարտությանը վերջ դնելու համար հարկավոր է ուղիղ եռակողմ հանդիպում անցկացնել ԱՄՆ-ի, Ուկրաինայի և Ռուսաստանի նախագահներ Դոնալդ Թրամփի, Վոլոդիմիր Զելենսկու և Վլադիմիր Պուտինի միջև։ Այս մասին Corriere della Sera թերթին տված հարցազրույցում հայտարարել է Ուկրաինայի նախագահի գրասենյակի ղեկավարի խորհրդական Միխայիլ Պոդոլյակը:
«Առանց Թրամփի, Զելենսկու և Պուտինի միջև ուղիղ եռակողմ հանդիպման ռուս-ուկրաինական պատերազմը ոչ միայն չի ավարտվի, այլև մենք նույնիսկ չենք սկսի քննարկել այդ հարցը», – ասել է Պոդոլյակը։
Նա նաև նշել է, որ Կիևը պատրաստ է քննարկել հրադադարը, այդ թվում՝ օդայինը՝ որպես բանակցային գործընթացի մեկնարկի առաջին քայլ: Պաշտոնյայի խոսքով՝ Ուկրաինան պատրաստ է քննարկել այդ սցենարը և դա համարում է «իրատեսական բանակցային դիրքորոշումների հասնելու սկզբնական փուլ»:
«Ցանկացած հրադադար, հատկապես համապարփակը, բանակցությունների պատշաճ մեկնարկի ելակետ է», – ասել է նա՝ հիշեցնելով լիակատար հրադադարի վերաբերյալ Միացյալ Նահանգների կողմից հնչեցված առաջարկը:
Օգոստոսի 15-ին Ալյասկայում սպասվում է ԱՄՆ-ի և Ռուսաստանի նախագահների հանդիպումը, որին Վոլոդիմիր Զելենսկու և եվրոպական երկրների ներկայացուցիչների մասնակցությունը չի նախատեսվում:
