«Մարսի» ու «Մերգելյանի» տարածքում գործող «Ալյանս» ազատ տնտեսական գոտին կլուծարվի
Երևանում գործող «Ալյանս» ազատ տնտեսական գոտին կլուծարվի։ Համապատասխան որոշումն ընդունվեց ՀՀ կառավարության այսօրվա նիստի ժամանակ։
ՀՀ կառավարության 2013 թ. հուլիսի 18-ի որոշմամբ «ՌԱՕ ՄԱՐՍ» ՓԲԸ-ի (Երևան, Րաֆֆու 111) և «ԵրՄՄԳՀԻ» ՓԲԸ-ի (Երևան, Հակոբ Հակոբյան 3) («Մերգելյան» ինստիտուտ) տարածքներում ստեղծվել է «Ալյանս» ազատ տնտեսական գոտին, որը շահագործվել է 2013 թ. օգոստոսի 14–ից` 10 տարի ժամկետով։ Այս ազատ տնտեսական գոտու գործունեության ժամկետը 2023 թ. և 2024 թ. մեկակական տարով երկարաձգվել է։
«Ալյանս» ԱՏԳ-ի գործառնական տեսակը սահմանվել է որպես արտադրաարդյունաբերական և տեխնիկակիրառական՝ կազմակերպության կողմից ներկայացված ոլորտներում։
Քանի որ ազատ տնտեսական գոտու գործունեության ժամկետն ավարտվում էր այս տարի, «Ալյանս» ազատ տնտեսական գոտու գործունեության երկարաձգման հայտ է ներկայացվել` 2025–2035 թթ. զարգացման գործարար ծրագրով։
Ծրագիրը ներկայացվել է Ազատ տնտեսական գոտիների հարցերով միջգերատեսչական հանձնաժողովի անդամներին, որոնց գնահատման արդյունքում միջին թվաբանական գնահատականը կազմել է 60.83 միավոր։ Հանձնաժողովի անդամներից երեքի կողմից գործարար ծրագիրը գնահատվել է անցողիկ շեմից ցածր (անցողիկ շեմ է համարվում 60 միավորը)։
Որոշման մեջ նշվում է նաև, որ հանձնաժողովի անդամներից առնվազն երեքի կողմից գործարար ծրագրի անցողիկ շեմից ցածր գնահատման դեպքում հայտի վերաբերյալ տրվում է բացասական եզրակացություն, ուստի՝ Հանձնաժողովը որոշել ՀՀ Երևան քաղաքում գործող «Ալյանս» ազատ տնտեսական գոտու գործունեության ժամկետը ևս 10 տարով երկարաձգելու հայտի վերաբերյալ տալ բացասական եզրակացություն։
