«Այդ հարցում մեզանից ի՞նչ է կախված՝ ոչինչ». Ներքին Հանդի վարչական ղեկավար
Օրերս ՀՀ նախագահ Վահագն Խաչատուրյանն այցելել Էր Սյունիքի մարզ: Մարզպետի ու համայնքապետերի հետ հանդիպման ժամանակ նա ասել է, որ Սյունիքը Հայաստանի զարգացման դարպասն է։
«Սյունիքը մեր զարգացման դարպասներն է դառնալու։ Եթե մենք կարողանում ենք Սյունիքի դարպասները բացել, ես նկատի ունեմ 43 կմ հնարավորությունը, ուրեմն վստահ եղեք, որ ապագան զարգացման առումով շատ մեծ հնարավորություններ է մեզ տալու»,- ասել է նա։
168.am-ը Ներքին Հանդի վարչական ղեկավար Խաչատուր Բաղդասարյանից հետաքրքրվեց՝ Վահագն Խաչատուրյանն արդյոք այցելե՞՚լ է Ներքին Հանդ և արդյո՞ք խոսել է այն հարցի մասին, թե ինչպե՞ս է լինելու գյուղի առանց այն էլ խարխլված անվտանգությունը՝ իր նշած ճանապարհը բացելուց հետո։
«Վահագն Խաչատուրյանը մեր գյուղ այցելել է, բայց ես նրան չեմ տեսել, գյուղում չեմ եղել։ Նա բնակիչների հետ հանդիպել է, ասում են՝ նաև անվտանգության հարցերին է անդրադարձել, բայց ի՞նչ կոնտեքստով՝ չեմ կարող ասել, ինքս այդ խոսակցությանը ներկա չեմ եղել։
Չեմ կարող ասել՝ բնակիչները գո՞հ են, թե՞ չէ այդ պատասխաններից, մի մասը գոհ է, մյուսները՝ ոչ, բոլորի հետ չեմ հասցրել խոսել»,- նշեց Վահագն Խաչատուրյանը։
Նա դժվարացավ որևէ կարծիք հայտնել Վահագն Խաչատուրյանի արտահայտած մտքի՝ «Սյունիքի 43 կմ ճանապարհը բացելու» վերաբերյալ՝ շեշտելով.
«Այդ հարցում մեզանից ի՞նչ է կախված՝ ոչինչ»։
Հիշեցնենք, որ 2022 թվականի սեպտեմբերին ադրբեջանական կողմից հարձակում եղավ Սյունիքի մարզի վրա, սահմանամերձ Ներքին Հանդ գյուղի գերեզմանոցը հայտնվեց Ադրբեջանի Զու վերահսկողության տակ, այսօր տեղի բնակիչները չեն կարողանում այցելել իրենց հարազատների շիրիմներին։
Հիշեցնենք նաև, որ 2023 թվականի փետրվարի 13-ին Ադրբեջանը Ներքին Հանդի հատվածում տեղակայված հայկական դիրքերի ուղղությամբ դիմել էր հերթական սադրանքին՝ ադրբեջանական զինուժի կրակի հետևանքով հայկական կողմն ունեցավ 4 զոհ և 1 վիրավոր:
Այս տարվա ապրիլից սկսած ադրբեջանական կողմը ևս ժամանակ առ ժամանակ կրակ էր արձակում գյուղի ուղղությամբ, երբեմն՝ թիրախավորված, երբեմն՝ առանց որևէ թիրախի։
