Եթե մարզում ես ապրում, ՉՄԵՌՆԵ՛Ս. դի տեղափոխելն առանց քաշքշուկի մեջ ընկնելու՝ խնդիր է. Անուշ Պողոսյան

Մի տարօրինակ երևույթ կա նաև դիահերձարաններում։ Այս մասին 168TV-ի «Առողջ որոշում» հաղորդաշարի ժամանակ ասաց «Առողջության իրավունք» հասարակական կազմակերպության նախագահ Անուշ Պողոսյանը:

Այս անգամ նա անդրադարձել է մի շարք մարզերում պաթանատոմիական ծառայությունները հիմնովին վերացնելուն։ Մարզերում դիահերձարանների օպտիմալացումը, ըստ Անուշ Պողոսյանի, ԱՆ նախարարը բացատրում էր, որ լավ ճանապարհներ են սարքել, թող 70 կմ դիակին տանեն, հերձեն։

«Եվ այսպես՝

1․Բոլոր դիերը տեղափոխվում են քննիչի որոշումով, այսինքն` դիտարկվում են որպես դատա-բժշկական փորձաքննության ենթակա մահեր, քանի որ օրենսդրորեն այլ կերպ չեն կարող մի բնակավայրից դին տեղափոխել այլ բնակավայր, ինչպես նաև շատ մարզերում չկան պաթանատոմիական ծառայություններ։ Այսինքն՝ այս որոշմամբ անարդյունավետ են վատնվում պետության ռեսուրսները և գումարը։

2․ Քանի որ դատաբժշկական փորձաքննությունը պետական պատվերի շրջանակներում է, ապա դեպքը փոխհատուցվում է պետության կողմից 41000 ՀՀ դրամ (36000+5000), սակայն հարբժշկական ծառայության տուրքը «Դատաբժշկական գիտագործնական կենտրոն» ՊՈԱԿ-ի կողմից սահմանված է 50000 ՀՀ դրամ, որը գանձվում է պարտադիր բոլոր մահացածների հարազատներից՝ «պարտադիր կամավորության» սկզբունքով:

Արդյունքում սահմանվել է ծառայության գումար, որի գնագոյացումը անհասկանալի է (ծախսվում է, օրինակ, մի քանի հարյուր դրամի ֆորմալին.- Ա.Պ.)։ Ստացվում է՝ ծանր փորձագիտական քննությունը բժիշկ-մասնագետների կողմից ավելի էժան է գնահատվում, քան սանիտարի կողմից դիակի հարդարումը։

3․ Դրան եթե գումարենք, որ դիակը պետք է վերադարձնեն իր բնակավայր արդեն հարազատների ծախսերի միջոցներով, հասկանալի է դառնում, թե ինչ ֆինանսական բեռ է առաջանում հանգուցյալի հարազատի վրա։

Հարց է առաջանում՝ հարբժշկական ծառայությունը դիակի խնամքի, մշակման (դաբաղման.- Ա.Պ.) ծառայությունն է, եթե հարազատը հրաժարվում է այս ծառայությունից, ի՞նչ տեսքով են դիակը տալիս հարազատներին։

Ի դեպ, Շիրակի մարզում ծանր պայքարով պահպանվել է պաթանատոմիական ծառայությունը, և մահերի ընդամենը 30 տոկոսն է դատաբժշկական փորձաքննության ենթարկվում»,- ասաց Անուշ Պողոսյանը:

Մանրամասները՝ տեսանյութում:

Բաժանորդագրվեք յութուբյան մեր ալիքին https://www.youtube.com/@168amofficial, գրեք ձեր հարցերը ձեզ հուզող խնդիրների մասին: