«Քաղաքական գործչին որևէ ռեպրեսիայով չեն կարող ճնշել. Վեհափառն իր տեղում է. վստահ եմ՝ չեն հաջողելու». Դավիթ Համբարձումյան
Մասիսի համայնքապետ, իմպիչմենտի գործընթացով վարչապետի թեկնածու Դավիթ Համբարձումյանը՝ ի պաշտպանություն Առաքելական եկեղեցու«Զվարթնոց» տաճարից մեկնարկած երթի ժամանակ լրագրողների հետ զրույցում նախ շնորհակալություն հայտնեց այն մարդկանց, որոնք հետևել են իր կոչին և մասնակցում են երթին՝ շեշտելով, որ օրը կարևոր է, քանի որ նշվում է Կաթողիկե Սուրբ Էջմիածնի տոնը։
«Հավաքվել ենք այստեղ, որպեսզի մեր շնորհավորական խոսքը փոխանցեք ժողովրդին, մեր աջակցությունը հայտնենք Վեհափառ Հայրապետին, հոգևոր դասին, նաև մեր աջակցությունը հայտնենք քաղբանտարկյալ Սամվել Կարապետյանին։ Ուզում եմ, պարոն Կարապետյանն իմանա՝ ինքը մենակ չէ, բոլորս իր հետ ենք»,- նշեց Դավիթ Համբարձումյանը։
Նա հնարավոր է համարում ազգային արժեքների շուրջ ժողովրդի լայն կոնսոլիդացիան՝ շեշտելով, որ նախկինում էլ է ասել՝ իրենց նպատակը հանրային համերշխության լայն օրակարգ ձևավորելն է և դրան հասնելու են քայլ առ քայլ։
«Ուզում ենք, որ մեր հանրության մեջ վերջապես վերանա ատելության մթնոլորտը և իրար հայհոյելու խոսույթը։ Այո՛, հնարավոր է կոնսոլիդացիա։ Նաև հնարավոր է, որ այսպես ժողովրդով շատ ավելի շուտ հասնենք սկսված իմպիչմենտի վերջնական հաղթանակին»,- շեշտեց նա։
Հարցին՝ հաշվի առնելով ռեպրեսիաները, որի վառ օրինակը Սամվել Կարապետյանի հետ տեղի ունեցածն է, արդյոք չի վախենո՞ւմ, որ իրեն ևս կարող են թիրախավորել իշխանությունները, Դավիթ Համբարձումյանը պատասխանեց՝ յուրաքանչյուր քրիստոնյա մարդ պետք է վախենա միայն Աստծուց։
«Մենք որևէ բանից չենք վախենում։ Այդ ռեպրեսիաների շրջանը վաղուց անցած է։ Ես այնպիսի մարդ եմ, որ յուրաքանչյուր պայքարի վերջում հաղթանակ եմ տեսնում, կարծում եմ՝ մեր պայքարը պետք է դրական արդյունք ունենա։ Վեհափառն իր տեղում է, եկեղեցին է որոշում, թե ով պետք է լինի Վեհափառ և իրենց կանոններով պետք է շարժվեն առաջ։ Թե իշխանություններն ինչ հանձնախումբ են ձևավորել ու ինչ են անելու՝ արդեն չգիտեմ։ Վստահ եմ, այս իշխանությունները չեն հաջողելու»,- հավելեց Դավիթ Համբարձումյանը։
Նշենք, որ այսօր՝ հունիսի 22-ին նշվում է Կաթողիկե Սուրբ Էջմիածնի տոնը, ինչի առիթով Սուրբ և Անմահ Պատարագ է մատուցվում Մայր Տաճարում։ Պատարագի ավարտին Ամենայն Հայոց Հայրապետի հանդիսապետությամբ կկատարվի մաղթանք Մայր Աթոռ Սուրբ Էջմիածնի անսասանության և հավետ պայծառության համար։
Այս առիթով բազմաթիվ հավատավոր հայեր որոշել են Զվարթնոց տաճարի մոտից երթ կազմակերպել դեպի Մայր տաճար՝ ի պաշտպանություն Առաքելական եկեղեցու, որը վերջին շրջանում ենթարկվում է ՀՀ իշխանությունների հարձակումներին։
Մնարամասները՝ 168.am-ի տեսանյութում
