ԻՊԲ-ն իսրայելցիներին նախազգուշացրել է սահմանափակել տեղաշարժը «առաջիկա ծանր օրերի» պատճառով
Իսրայելի պաշտպանության բանակը (ԻՊԲ) երկրի բնակիչներին նախազգուշացրել է, որ առաջիկայում շատ կլինեն օդային տագնապի ազդանշանները, ուստի բոլորը պետք է պատրաստ լինեն պատսպարվելու։
Այս մասին հաղորդագրությունն ԻՊԲ-ն տարածել է իր Telegram ալիքում։Նշվում է, որ յուրաքանչյուր քաղաքացի տագնապը հնչելուն պես պետք է մտնի պաշտպանված տարածք և այնտեղ մնա, մինչև հետագա ծանուցում կստացվի։
«Հարկավոր է խուսափել դրսում ոչ անհրաժեշտ տեղաշարժերից և զերծ մնալ ճանապարհին երթևեկելուց։ Մեզ սպասվում են բարդ և դժվարին օրեր», – նշված է հաղորդագրության մեջ։
Իսրայելի ԶՈւ գլխավոր շտաբի պետն իր հերթին հայտարարություն է տարածել՝ նշելով, որ Իրանի դեմ գործողությունը սկսվել է, և այլևս «հետդարձի ճանապարհ չկա»։
«Ես նախազգուշացնում եմ բոլորին, որ ցանկացած մեկը, ով կփորձի մարտահրավեր նետել մեզ, ծանր գին կվճարի», – հայտնել է գլխավոր շտաբի պետ, գեներալ-լեյտենանտ Էյալ Զամիրը։ Նա ասել է, որ Իսրայելը սկսել է գործողությունը, որպեսզի ռազմավարական հարվածներ հասցնի Իրանից Իսրայելին սպառնացող վտանգներին։
Իր հերթին, The Times of Israel-ը նշում է, որ իսրայելցիները շտապում են սուպերմարկետներ, քանի որ Իրանից հրթիռային հարվածներ են սպասվում։ Իրանը հայտնել էր, որ վճռորոշ պատասխան կտա Իսրայելի հարձակմանը։
