ՊՆ-ն հրաժարվել է տեղեկություն տրամադրել ՀՀ զինված ուժերի՝ Մոսկվայի տոնական շքերքին մասնակցության մասին

Ապրիլի 19-ին 168.am-ը գրավոր հարցում էր ուղարկել ՀՀ պաշտպանության նախարարություն՝ պարզելու՝ ՀՀ զինված ուժերը մասնակցելո՞ւ են Մոսկվայում կայանալիք Հայրենական Մեծ պատերազմում հաղթանակի 80-ամյակին նվիրված շքերթին:

Մայիսի 6-ին պատասխան գրության մեջ ՀՀ պաշտպանական գերատեսչությունը մեր կողմից հայցվող տեղեկությունը հրաժարվել է տրամադրել՝ հղում անելով «Պետական գաղտնիքի մասին» օրենքի 29-րդ հոդվածին (Սահմանափակ տարածման ծառայողական տեղեկությունը), «Տեղեկատվության ազատության մասին» ՀՀ օրենքի 8-րդ հոդվածի 1-ին կետի 1-ին ենթակետին և ՀՀ կառավարության 11.01.2024թ. N5З-Ն որոշման 8-րդ կետի պահանջներին:

Նշենք, որ Ադրբեջանի զինված ուժերը մասնակցելու են տոնական շքերթին՝ 80 հոգուց բաղկացած խմբով:

ՀՀ ՊՆ-ի պատասխանից կարելի է ենթադրել, որ ՀՀ զինված ուժերը չեն մասնակցելու տոնական շքերթին, որի փորձերը վաղուց արդեն սկսվել են։ Սա, թերևս, քաղաքական որոշում է, կամ՝ մեկ անձի՝ Նիկոլ Փաշինյանի որոշումը:

Կասկածի տակ է նաև այս պահին Հունաստանում աշխատանքային այցով գտնվող ՀՀ պաշտպանության նախարար Սուրեն Պապիկյանի Մոսկվա գնալու հարցը։ Ամենայն հավանականությամբ, նա չի մեկնի, հատկապես, երբ Նիկոլ Փաշինյանը, ըստ Կրեմլի, հրավերն ընդունել է։