Չինաստանի ԱԳ նախարարն աջակցություն է հայտնել այլ երկրների հետ Իրանի երկխոսությանը
Չինաստանի արտաքին գործերի նախարար Վան Ին Իրանի ԱԳ նախարար Աբբաս Արաղչիի հետ հանդիպմանը հայտարարել է, որ Պեկինն աջակցում է Իրանին՝ բոլոր կողմերի, այդ թվում՝ Միացյալ Նահանգների հետ երկխոսություն վարելու հարցում։
Այս մասին հայտնում է «ՌԻԱ Նովոստի»-ն՝ հղում կատարելով Չինաստանի ԱԳՆ-ի տարածած հաղորդագրությանը։
Նշվում է, որ կողմերը մտքերի փոխանակում են ունեցել Իրանի միջուկային խնդրի շուրջ վերջին զարգացումների շուրջ։
«Չինաստանը միշտ հավատարիմ է եղել Իրանի միջուկային հիմնախնդրի քաղաքական և դիվանագիտական կարգավորմանը և դեմ է ցանկացած հնարավորության դեպքում ուժի կիրառմանն ու անօրինական միակողմանի պատժամիջոցներին»,- ասել է Վան Ին։
Նա նշել է, որ Չինաստանը բարձր է գնահատում միջուկային զենք չստեղծելու Իրանի հանձնառությունը և հարգում է միջուկային էներգիան խաղաղ նպատակներով օգտագործելու Թեհրանի իրավունքը։
«Չինաստանն աջակցում է Իրանին՝ երկխոսության մեջ մտնելու բոլոր կողմերի, այդ թվում՝ ԱՄՆ հետ՝ խորհրդակցությունների և բանակցությունների միջոցով պաշտպանելու իր օրինական իրավունքներն ու շահերը, որոնք կնպաստեն միջազգային չտարածման համակարգի պահպանմանը և տարածաշրջանային խաղաղությանն ու կայունության ամրապնդմանը»,-հավելել է Չինաստանի ԱԳ նախարարը։
Իրանի ԱԳ նախարար Աբբաս Արաղչին, իր հերթին, ընդգծել է, որ Թեհրանը բարձր է գնահատում Չինաստանի կարևոր և դրական դերն Իրանի միջուկային հիմնախնդրի քաղաքական և դիվանագիտական լուծման խթանման գործում։
