Բոլիվիայում արտակարգ դրության ռեժիմ է հայտարարվել հեղեղումների պատճառով
Բոլիվիայի կառավարությունն արտակարգ դրության ռեժիմ է հայտարարել անձրևներից առաջացած հեղեղումների պատճառով, որոնք վերջին ամիսներին ավելի քան 50 մարդու կյանք են խլել։ ՏԱՍՍ գործակալության փոխանցմամբ՝ այդ մասին հայտնել է երկրի նախագահ Լուիս Արսեն։
«Տարերային աղետները հարկադրում են արտակարգ դրություն հայտարարել երկրում: Այսօր մենք հրապարակել ենք համապատասխան հրամանագիրը, որը կարագացնի հասցված վնասի դեմ պայքարում ներգրավված բոլորի աշխատանքը», – ասել է նա մամուլի ասուլիսում։
Արսեի խոսքով՝ տեղատարափ անձրևներից տուժել է 209 մունիցիպալիտետ։
«Այս տարի (տարերքից) ոչնչացել է 818 տուն, որոնք մենք կվերականգնենք։ Մենք ունենք տվյալներ 51 զոհի մասին, 8 մարդ համարվում է անհետ կորած», – հայտնել է պետության ղեկավարը։
Բոլիվիայում անձրևների սեզոնն սկսվել է 2024 թ. նոյեմբերին։
Վերջին շաբաթվա ընթացքում իրավիճակը սրվել է։ Իշխանությունների տվյալներով՝ այս սեզոնին տեղացած անձրևներն ամենասաստիկն են դարձել վերջին 40 տարվա ընթացքում:
