Արաքս գետի վրա նոր կամուրջ կկառուցվի. Իրանի և ՀՀ արտգործնախարարները քննարկում են ունեցել
Իրանը և Հայաստանը պայմանավորվել են Արաքս գետի վրա ևս մեկ կամուրջ կառուցելու վերաբերյալ։ Այս մասին ՀՀ արտաքին գործերի նախարար Արարատ Միրզոյանի հետ համատեղ ասուլիսի ժամանակ հայտնեց Իրանի արտգործնախարար Աբբաս Արաղչին։
Նա ընդգծեց, որ Իրանը ողջունում է երկու երկրների միջև տնտեսական հարաբերությունների զարգացումը։
«Պայմանավորվել ենք լավագույնս օգտագործել այն պոտենցիալը, որն առկա է հարաբերություններում։ Իրանը պատրաստ է Հայաստանի հետ պայմաններ ստեղծել տարանցիկ ոլորտում` դեպի Սև ծով, Պարսից ծոց և Հնդկաստան իրականական բեռնափոխադրումներն իրականացնելը հեշտացնելու համար։ Արաքս գետի վրա նոր կամուրջ կառուցելն էլ ավելի կդյուրացնի բեռնափոխադրումները»,– ասաց Իրանի արտգործնախարարը։
Արաղչին շեշտեց` Իրանի և Հայաստանի միջև դինամիկ զարգացում է արձանագրվում հատկապես զբոսաշրջության և մշակութային ոլորտներում, նաև առևտրի մեջ ու տնտեսական ծրագրերում։
