Դու ստում ես. դու համալրում ես թուրքական ժխտողականության շարքերը. Մենուա Սողոմոնյանը՝ Փաշինյանին
Թուրքական ժխտողականության «աստղերի» ցուցակում ստիպված ենք ավելացնել Նիկոլ Փաշինյանի անունը։ «Եռաբլուր»-ում լրագրողների հետ զրույցում այս մասին հայտարարեց պատմաբան, «ՀայաՔվե» նախաձեռնության ներկայացուցիչ Մենուա Սողոմոնյանը։
Ավելի վաղ Դավոսում Շվեյցարիայի հայ համայնքի հետ հանդիպմանը Նիկոլ Փաշինյանն ասել էր, որ պետք է հասկանալ, ինչ է տեղի ունեցել Հայոց ցեղասպանության ժամանակ, ինչու է դա տեղի ունեցել, և ինչպես է այդ ամենն ընկալվել, ինչու Հայոց ցեղասպանության հարցը 1939 թվականին չի եղել օրակարգում, իսկ 1950 թվականին հայտնվել է։
«Ցեղասպանության ժխտումը Թուրքիայի նախապայմանի ուղիղ կատարումն է։ Մեր իշխանությունը Թուրքիայի բոլոր նախապայմանները մի բան էլ բոնուսով կատարել է, գերակատարել է թուրք-ադրբեջանական տանդեմի կողմից իրեն տրված հանձնարարությունները։ Հիմա հերթը հասել է նրան, որ ուզում են կազմաքանդել հայկական բանակի հիմքերը»,- ասաց նա։
Մենուա Սողոմոնյանն անդրադարձավ նաև Փաշինյանի այն հայտարարությանը, թե Արարատի և Արագածի դիսկուրսը շատ կարևոր է առաջին հերթին բանակի բարեփոխումների համար, քանի որ Արարատի ու պատմական Հայաստանի խոսույթի ներքո Հայաստանին ոչ ոք զենք չի վաճառի։
«Այդպիսի բառակազմ օգտագործելը հերթական սուտն ու մանիպուլյացիան է։ Թող նշի մի նախագահի, արտգործնախարարի, պաշտպանության նախարարի, ԳՇ պետի մի հայտարարություն, որտեղ կա Մուշը, Վանը, Ադանան հետ բերելու մասին խոսույթ, ու այդ ամեն ինչը կապվում է բանակի հետ։ Չկա նման բան. ՀՀ–ի ռազմական դոկտրինում, ՀՀ անվտանգության ռազմավարության մեջ նման բան չկա նշված։ Ինքը հորինում է ինչ-որ թեզեր, որոնց ներքո իրականում բավարարում է թշնամիների պահանջը` մեր բանակը կազմաքանդելու հետ կապված»,- հայտարարեց «ՀայաՔվե» նախաձեռնության ներկայացուցիչը։
Ըստ նրա` ավելի լավ է` Փաշինյանը պատասխան տա այն հարցին, թե ժողովրդի հարկերից մուծված միջոցները, որոնք նախատեսված են եղել երկրի ռազմարդյունաբերություն զարգացման համար, ինչու չեն օգտագործվել հավուր պատշաճի, ինչու 2024 թվականի համար նախատեսված 5.8 մլրդ դրամից ծախսվել է ընդամենը 1.1 մլրդ դրամը։
Բացի այդ, ըստ Սողոմոնյանի, 2021 թվականից սկսած ռազմական ծախսերը մեր երկրում միշտ թերակատարվել են։
