Կառավարությունը հաստատեց «ԳՐԱՆԴ ՔԵՆԴԻ» ներդրումային ծրագրին նոր արտոնություններ տրամադրելու նախագիծը
Կառավարության հունվարի 9-ի նիստում հաստատվեց «Հայաստանի Հանրապետության կառավարության 2023 թվականի հուլիսի 6-ի N 1122-Ա որոշման մեջ լրացումներ և փոփոխություններ կատարելու մասին» նախագիծը, որը վերաբերում է «ԳՐԱՆԴ ՔԵՆԴԻ» ՍՊ ընկերության կողմից իրականացվող ներդրումային ծրագրին։
Նախագիծը նախատեսում է «ԳՐԱՆԴ ՔԵՆԴԻ» ընկերության կողմից ներմուծվող տեխնոլոգիական սարքավորումները, բաղկացուցիչ մասերը, հումքն ու նյութերը մաքսատուրքից ազատելու արտոնության կիրառումը ամբողջ ծավալով։ Սա անհրաժեշտ է հրուշակեղենի արտադրության համար նախատեսված 7․4 մլրդ դրամի լրացուցիչ հումքի ներմուծումն ապահովելու նպատակով։
«ԳՐԱՆԴ ՔԵՆԴԻ» ընկերությունը հիմնադրվել է 2000 թվականին և զբաղվում է հրուշակեղենի արտադրությամբ, որի հիմնական շուկան Հայաստանի Հանրապետությունն է։
Շուկայական պահանջարկի աճի պատճառով ընկերությունը նախատեսում է լրացուցիչ հումք ներմուծել, ինչը բարձրացնում է ներդրումային ծրագրի ընդհանուր արժեքը՝ հասցնելով այն 90․6 մլրդ դրամի։ Արտոնությունը կազատի ներմուծվող ապրանքների մաքսատուրքից՝ ապահովելով մոտ 8․8 մլրդ դրամի խնայողություն։
Նախագծի ընդունմամբ ակնկալվում է նոր աշխատատեղերի ստեղծում՝ ներդրումային ծրագրի ընդլայնման արդյունքում, տեղական արտադրության խթանում՝ ներքին շուկայի պահանջարկի բավարարման համար, արդյունաբերության տեխնիկական հագեցվածության բարձրացում։
