Թբիլիսիում խորհրդարանի շենքի մոտ բախումներից տուժել է 32 ոստիկան, կան բերման ենթարկվածներ. Զուրաբիշվիլին ԵՄ-ից «կոշտ արձագանք» է ակնկալում
Վրաստանի ՆԳՆ հատուկջոկատայիններն ամբողջությամբ դուրս են մղել ցուցարարներին Թբիլիսիի Ռուսթավելի պողոտայից։ Այս մասին դեպքի վայրից հայտնում է ՏԱՍՍ-ի թղթակիցը։
Ոստիկանությունը կրկին արցունքաբեր գազ է կիրառել. մի քանի հոգի բերման են ենթարկվել։ Ցուցարարները չեն դիմադրել իրավապահներին։
Ռուսթավելի պողոտայում ցուցարարների և ոստիկանների դիմակայությունը շարունակվել է ամբողջ գիշեր։ Ցուցարարներն այրել են աղբամաններ և փայտե աթոռներ՝ փորձելով հեռու մնալ իրավապահներից: Նրանց միջև ժամանակ առ ժամանակ բախումներ են եղել։ Ոստիկանությունը ջրցան մեքենաներ և արցունքաբեր գազ է կիրառել։
Մինչդեռ Վրաստանի նախագահ Սալոմե Զուրաբիշվիլին եվրոպացի առաջնորդներից «կոշտ արձագանք» է ակնկալում Թբիլիսիում բողոքի ցույցը բռնի ցրելու կապակցությամբ։
«Ես ակնկալում եմ կոշտ արձագանք եվրոպական մայրաքաղաքներից»,- գրել է Զուրաբիշվիլին X սոցիալական ցանցի իր էջում։
Հիշեցնենք, որ երեկ վարչապետ Իրակլի Կոբախիձեն հայտարարել է, որ Վրաստանը հրաժարվում է ԵՄ-ին անդամակցելու շուրջ բանակցություններից մինչև 2028 թվականը, ինչպես նաև հրաժարվում է եվրոպական դրամաշնորհներից:
