Թուրքիայում ընդդիմադիր քաղաքական գործիչ է ձերբակալվել
Թուրքիայի ոստիկանությունը երկրի հարավարևելյան հատվածում գտնվող Դիարբեքիր նահանգի մի շարք հասցեներում խուզարկություններ է իրականացրել: Այս մասին տեղեկացնում է ermenihaber.am-ը։
Մասնավորապես խուզարկություն է իրականացվել Քայափընար շրջանի համաղեկավար Ջենքիդ Դյունդարի, «Միջագետքի կանանց լրագրողների ասոցիացիայի» (MKG) նախագահ Ռոզա Մեթինայի և «Կրթության ու գիտության թոշակառուների արհմիության» անդամ ուսուցիչների տներում:
Ինչպես նշվում է աղբյուրում, արդյունքում ձերբակալվել են մի շարք անձինք, այդ թվում՝ Դյունդարը, ՄԵթինան, ուսուցիչներ և լրագրող Ահմեդ Սյումբյուլը: Նրանք ուղարկվել են «Ահաբեկչության դեմ պայքարի բաժանմունք»:
Նշենք, որ Քայափընար շրջանի համաղեկավարը թուրքական ընդդիմադիր «Ժողովուրդների հավասարություն և ժողովրդավարություն» (DEM) կասկցության անդամ է:
Մինչ իր ձերբակալումը Դյունդարը սոցցանցում գրառում է կատարել՝ ասելով. «Ոստիկանները ներթափանցեցին իմ տուն, խուզարկություն են իրականացնում: Ինձ ձերբակալելու են»:
