Իսրայելն ԱՄՆ-ին հայտնել է, որ Իրանին անհապաղ պատասխան հարված հասցնելու անհրաժեշտություն չի տեսնում. The Washington Post
Իսրայելի իշխանություններն ԱՄՆ-ին հավաստիացրել են, որ անհրաժեշտ չեն համարում Իրանի վրա անհապաղ հարձակվելը՝ ի պատասխան Թեհրանի հրթիռային հարվածի: Այս մասին հաղորդում է The Washington Post-ը՝ հղում անելով աղբյուրների։
Ըստ հրապարակման՝ ԱՄՆ վարչակազմի մի քանի բարձրաստիճան ներկայացուցիչներ, որոնց անունը չի նշվում, հոկտեմբերի 2-ին հայտնել են, որ Իսրայելի պաշտոնատար անձինք մասնավոր կերպով պարզաբանել են, որ իրենք Իրանին անհապաղ կամ լայնամասշտաբ պատասխան հարված հասցնելու անհրաժեշտություն չեն տեսնում:
Սակայն ԱՄՆ-ն և Եվրոպան վախենում են, որ Իսրայելը կարող է գրոհել Իրանի «տնտեսական թիրախների վրա»: Եվրոպական երկրներից մեկի բարձրաստիճան ներկայացուցիչը թերթին ասել է, որ Թեհրանը վաղուց հստակեցրել է՝ գրոհը նավթի և գազի ոլորտի օբյեկտների վրա իր համար կդառնա «կարմիր գիծ»:
Ավելի վաղ Axios-ը գրել էր, որ Իսրայելը կարող է թիրախավորել իրանական կարևոր ենթակառուցվածքային օբյեկտներ, այդ թվում՝ նավթի արդյունահանման օբյեկտները։
