ԱՄՆ-ն խորապես ներգրավված է Հարավային Կովկասի հարցերում․ Վեդանտ Պատել
Միացյալ Նահանգները շարունակում է ներգրավված լինել Հարավային Կովկասի հարցերում և այդ ուղղությամբ կշարունակի աշխատանք տանել։
Այս մասին լրագրողների հետ ճեպազրույցի ընթացքում հայտարարել է Պետքարտուղարության խոսնակի տեղակալ Վեդանտ Պատելն՝ անդրադառնալով ԱՄՆ Կովկասյան բանակցությունների հարցերով ավագ խորհրդական Լուի Բոնոյի՝ տարածաշրջան կատարած այցին և դրա արդյունքներին։
«Սա մի հարց է, որում ինչպես պետքարտուղարն, այնպես էլ համակարգող Բոնոն շարունակում են խորապես ներգրավված լինել։ Այդ ուղղությամբ մենք շարունակելու ենք աշխատել», – իր խոսքում նշել է Պատելը՝ չմանրամասնելով, սակայն, Լուի Բոնոյի այցի արդյունքները։
ԱՄՆ պետքարտուղարության խոսնակի տեղակալը, խոսելով հուլիսի 30-ին հայ-թուրքական սահմանին տեղի ունենալիք ԱԺ փոխնախագահ, Թուրքիայի հետ հարաբերությունների կարգավորման գործընթացում Հայաստանի հատուկ ներկայացուցիչ Ռուբեն Ռուբինյանի և Հայաստանի հետ հարաբերությունների կարգավորման գործընթացում Թուրքիայի հատուկ ներկայացուցիչ Սերդար Քըլըչի հանդիպման վերաբերյալ հարցին, նշել է․
«Կրկին, պարզապես կասեմ, որ դա մի բան է, որի վրա պետքարտուղարը կենտրոնացած է, և մենք կշարունակենք խորապես ներգրավված լինել»։
