Ինչո՞ւ ուղղորդված կալանավորվեցին Մախսուդյանի որդիները. Նազարյանը` ՀՀ գլխավոր դատախազին
ՀՀ ԱԺ պետաիրավական հարցերի մշտական հանձնաժողովի նիստի ժամանակ «Դատախազության 2023 թ. գործունեության մասին հաղորդման» քննարկման ժամանակ ՀՀ ԱԺ «Հայաստան» խմբակցության պատգամավոր Գեղամ Նազարյանը գլխավոր դատախազ Աննա Վարդապետյանից հետաքրքրվեց՝ ինչո՞ւ ուղղորդված կալանավորվեցին պահեստազորի գնդապետ, տավուշյան իրադարձությունների ակտիվ մասնակից Միհրան Մախսուդյանի որդիները։
«Մի ընտանիքից երկու տղայի կալանավորե՞լ, Մախսուդյանի երկու որդիներին էլ կալանավորե՞լ, որոնք հանուն հայրենիքի են պայքարում Տավուշում և մասնակցում ակցիաների։ Հիմա ինչ-որ քաշքշուկների համար նրանց կալանավորում են։ Այնտեղ շատերը կան ու ճանապարհ են փակել, սակայն ուղղորդված հենց Մախսուդյանի որդիներին են կալանավորում։ Ինչո՞ւ։ 2018 թ. քանի՞ փողոց փակողի կալանավորեցին կամ ձերբակալեցին, քանի՞ դուռ ջարդողի կալանավորեցին»,- հետաքրքրվեց Նազարյանը։
Նա մի շարք այլ հարցեր ևս ուղղեց գլխավոր դատախազին։ Մասնավորապես պատգամավորը հետաքրքրվեց` ինչո՞ւ կալանավորումը ՀՀ–ում շարունակում է մնալ որպես պատիժ, այլ ոչ թե որպես նախաքննության մաս, արդյոք գլխավոր դատախազին չի՞ անհանգստացնում այն, ինչ տեղի է ունենում Մամիկոն Ասլանյանի, Արմեն Աշոտյանի, Վազգեն Սաղաթելյանի ու Նարեկ Սամսոնյանի, Լևոն Քոչարյանի հետ։
Նազարյանը հարց ուղղեց նաև դպրոցներում թմրամիջոցների ապօրինի շրջանառության մասին՝ հետաքրքրվելով.
«8-րդ, 9-րդ դասարանցի երեխաները դպրոցում ոչ միայն օգտագործում, այլև վաճառում են թմրամիջոց։ Ի՞նչ քայլեր է անում դատախազությունն այս ուղղությամբ»։
Ի պատասխան ՀՀ գլխավոր դատախազ Աննա Վարդապետյանը հայտարարեց, որ պատգամավոր հարցերին կպատասխանի սահմանադրական ուղիղ տրամաբանության մեջ` «քաղաքական զսպվածությամբ»։
«Ես խոսում են իրավական տերմինալոգիայով և չեմ կարող քաղաքական գնահատականներ տալ։ Անընդհատ դատախազությանը բերում են քաղաքական երկխոսության դաշտ, սակայն ես ձեզ ասում եմ` մենք չենք մտնելու դրա մեջ։ Դուք ընտրողաբար խոսեցիք 4-5 անձի մասին, սակայն մեր երկրում կալանքի տակ է գտնվում 2000-ից ավելի մարդ։
Ինչո՞ւ եք ինձ հարցնում 4 անձի մասին, որոնցից երկուսը կոռուպցիոն հանցագործության մեջ են մեղադրվում։
Դատախազությունը շատ մանրամասն է քննում յուրաքանչյուր գործ` մինչև դատարանը ներկայացնելը։ Մենք միայն ծայրահեղ դեպքերում ենք կալանք պահանջում որպես խափանման միջոց»,- հայտարարեց Վարդապետյանը։
Ինչ վերաբերում է թմրամիջոցների ապօրինի շրջանառությանը, ապա Վարդապետյանն ասաց, որ իրենք հիմնականում փորձում են փակել «խոշոր խաղացողների» ճանապարհը և հարուցում են քրեական վարույթներ։
Նա այդպես էլ չպատասխանեց Միհրան Մախսուդյանին վերաբերող հարցին։
Հիշեցնենք, որ պահեստազորի գնդապետ Միհրան Մախսուդյանի որդին՝ Վահագն Մախսուդյանը, որը մասնակցում է տավուշյան բողոքի ակցիաններին, ապրիլի 28-ին 2 ամսով կալանավորեց:
