ԱՄՆ-ն հիպերձայնային հրթիռի հերթական փորձարկումն է անցկացրել
Միացյալ Նահանգները մարտի 17-ին անցկացրել է օդային բազավորման AGM-183A հիպերձայնային հրթիռի փորձարկումը։ Այդ մասին մարտի 20-ին հաղորդում է Defense News-ը՝ վկայակոչելով ԱՄՆ ռազմաօդային ուժերի ներկայացուցչին։
Նրա խոսքով՝ արձակումն իրականացվել է B-52H ռազմավարական ռմբակոծիչից, որն օդ է բարձրացել Գուամի Անդերսեն ռազմաօդային բազայից։
Հրատարակության զրուցակիցը չի հստակեցրել՝ արդյոք փորձարկումը հաջող է եղել, սակայն նշել է, որ «ստացվել են արժեքավոր, բացառիկ տվյալներ. փորձարկումը նախատեսված է մի շարք հիպերձայնային ծրագրերի հետագա զարգացման համար»։
«Մենք նաև հաստատել և բարելավել ենք մեր թեստավորման հնարավորություններն ու գնահատականները՝ առաջադեմ հիպերձայնային համակարգերի մշակումները շարունակելու համար», – հավելել է նա:
Հիպերձայնային այս հրթիռը ԱՄՆ ռազմաօդային ուժերի երկու հիմնական ծրագրերից մեկն է՝ ստեղծելու օդային բազավորման հիպերձայնային զենք, որը կարող է թռչել Մախ 5-ից (ձայնի արագությունից ավելի քան հինգ անգամ մեծ արագություն) ավելի արագ և բարձր մանևրելու հնարավորություն ունի: Պարբերականը նշում է, որ Չինաստանը և Ռուսաստանը մեծ ներդրումներ են կատարել իրենց սեփական հիպերձայնային զենքի մեջ, և Պենտագոնը գտնվում է Կոնգրեսի ճնշման տակ՝ ավելի մեծ առաջընթաց ցույց տալու Միացյալ Նահանգների սեփական հնարավորությունները զարգացնելու ուղղությամբ:
