Գիտնականները ահազանգում են համաշխարհային պարենային անվտանգության սպառնալիքի մասին
Գլոբալ տաքացման պատճառով մորեխների հաճախակի արշավանքները սպառնում են գլոբալ պարենային անվտանգությանը, հայտնել են սինգապուրցի և չինացի գիտնականները Science Advances գիտական ամսագրի հոդվածում:
«Կլիմայի տաքացումն ամենուրեք կհանգեցնի մորեխների արշավանքների համատարած աճի՝ նոր մարտահրավերներ ներկայացնելով մորեխների դեմ պայքարի գլոբալ համակարգման համար», – նշում է պարբերականը։
Միջին ջերմաստիճանի բարձրացումը և տեղումների ավելացումը նպաստավոր պայմաններ կստեղծեն վնասատուի համար դրա ներխուժման համար ոչ բնորոշ տարածքներում և կվատթարացնեն իրավիճակը Աֆրիկայի և Հարավային Ասիայի ավանդական «թեժ կետերում»: Հետազոտության մեջ ասվում է, որ մորեխների արշավանքների տարածքը կշարունակի ընդլայնվել, նույնիսկ եթե ակտիվորեն պայքարեն ածխածնի արտանետումների դեմ:
Ավելին, միջատները ավելի հաճախ են «հարձակվում» միաժամանակ մի քանի իրարից հեռու գտնվող երկրների վրա, օրինակ՝ Հնդկաստանի և Մարոկկոյի: Նման սինխրոն արշավանքները մեծ վտանգ են ներկայացնում ողջ աշխարհի համար։
«Քանի որ Աֆրիկան և Հարավային Ասիան երկուսն էլ կարևոր հացառատ վայրեր են աշխարհի համար, մորեխների միաժամանակյա արշավանքները կարող են հանգեցնել բերքատվության լուրջ կրճատման, ինչը սպառնում է համաշխարհային պարենային անվտանգությանը», – զգուշացնում են գիտնականները:
Ուսումնասիրությունը ցույց է տվել, որ Schistocerca gregaria անապատային մորեխը պարբերաբար վնաս է հասցնում Աֆրիկայի, Մերձավոր Արևելքի և Հարավային Ասիայի տարբեր շրջանների գյուղատնտեսությանը: Մոտ մեկ քառակուսի կիլոմետր մակերեսով պարսը, որը ներառում է 80 միլիոն միջատ, ունակ է օրական ուտել այնքան բերք, որը կկերակրեր 35 հազար մարդու: Հիդրոկլիմայական պայմանները հսկայական դեր են խաղում անապատային մորեխների կյանքում. նրանց ձվերին պահանջվում է չափավոր խոնավություն, իսկ թռիչքի մկաններին՝ բավարար տաքացում, բացատրել են գիտնականները:
