Անխուսափելի է այն օրը, երբ իր իսկ ստեղծած խառնաշփոթին զոհ է դառնալու հենց ինքը՝ Փաշինյանը. հարցեր՝ քաղբանտարկյալ Արմեն Աշոտյանին

Քաղաքացիները շարունակում են հարցեր ուղղել «Նուբարաշեն» ՔԿՀ-ում գտնվող քաղբանտարկյալ Արմեն Աշոտյանին

Հարց 1.

Լուսինե Կիրակոսյան – Արմեն Աշոտյանն ինչպե՞ս է դիմավորել Ամանորը բանտախցում։

Արմեն Աշոտյանի պատասխանը – Ամանորն ընտանեկան առիթ է, և թեպետ Նիկոլ Փաշինյանի անձնական հրահանգով և անբարոյականության պատճառով, արդեն 7 ամիս է, ինչ ընտանիքիս կողքին չեմ, այնուամենայնիվ միայն ֆիզիկապես եմ եղել բանտախցում։ Հոգով, մտքով, սրտով թե՛ այդ օրը, թե՛ Սուրբ Ծնունդն անցկացրել եմ երեխաներիս կողքին, ընտանիքիս հետ։

Սեղանին եղել է մի փոքր քանակի միրգ, քաղցրավենիք, չրեղեն։ Հեռուստացույցով լսել եմ Վեհափառ Հայրապետի խոսքը։ Անմիջապես 12-րդ զարկից հետո աղոթել եմ իմ ընտանիքի և իմ Հայրենիքի համար։ Շնորհավորել եմ հարկում հերթապահություն իրականացնող հսկիչներին։

Հարց 2.

Կարեն Մեսրոպյան – Նիկոլն աշխատանքից ազատել է Լոռու մարզպետին, առհասարակ Նիկոլը խառն է։ Ի՞նչ եք կարծում, ինչո՞ւ։

Արմեն Աշոտյանի պատասխանը – Հայ ժողովրդի գլխին այդքան աղետ բերած, այդքան ստեր` թե ներսում, թե դրսում խոստացած, այդքան ստորություններ և մեղքեր գործած մարդը, անշուշտ, պետք է, Ձեր ասած, «խառը» լինի։ Այդ խառնաշփոթը նախևառաջ իր գլխում է, իր հոգում է, իր սրտում է (Ամանորի օրերին գուցե նաև՝ ստամոքսում)։ Եվ թեպետ Փաշինյանը մինչ այսօր այդքանից հետո դրսևորում է քաղաքական կենսունակության ռեկորդներ, քաղաքական անմահության հասնել դեռ ոչ մեկին չի հաջողվել։ Ուստի անխուսափելի է այն օրը, երբ իր իսկ ստեղծած խառնաշփոթին զոհ է դառնալու հենց ինքը։ Որոշակի տիեզերական արդարություն կա Նիկոլի կադրային ջարդի մեջ, բայց մի տեսակ կիսատ է, քանի դեռ չի տարածվել անձամբ իր վրա։