Ի՞նչ է ցանկանում հայկական կողմից Իրանը․ Իրանի ԱԳ նախարարը Հայաստանում է
Այսօր աշխատանքային այցով Հայաստանի Հանրապետություն է ժամանել ԻԻՀ ԱԳ նախարար Ամիր Հոսեյն Աբդոլլահիանը։
Իրանի ԱԳ նախարարությունն այցի օրակարգի վերաբերյալ կարճ հաղորդագրություն է տարածել՝ տեղեկացնելով, որ ակնկալվում է՝ Իրանի ԱԳՆ ղեկավարը Հայաստանի իշխանությունների հետ կքննարկի մշակութային, առևտրային, տնտեսական և քաղաքական ոլորտներում համագործակցության և երկկողմ հարաբերությունների ներկայիս վիճակը, ինչպես նաև տարածաշրջանային և միջազգային օրակարգի որոշ հարցեր։
Հաղորդագրության համաձայն, մասնավորապես, Ամիր Աբդոլլահիանը նախատեսում է քննարկել Հարավային Կովկասի վերջին իրադարձությունները, ինչպես նաև «3+3» ձևաչափը Հարավային Կովկասում իրավիճակի կարգավորման համար։
Մինչ այս այցը՝ երեքշաբթի օրը, Իրանի արտգործնախարարը Ռուսաստանի և Ադրբեջանի արտգործնախարարների հետ քննարկել էր Հարավային Կովկասում տիրող իրավիճակը և, այսպես կոչված, խաղաղության համաձայնագիրը, այսինքն՝ այս հեռախոսազրույցները ևս եղել են Հայաստան-Ադրբեջան հնարավոր Խաղաղության համաձայնագրի ստորագրման թեմայով։
Ուշագրավ է, որ օրերս էլ՝ դեկտեմբերի 20-ին, Փաշինյան-Ռաիսի հեռախոսազրույց էր տեղի ունեցել։ ՀՀ կառավարությունն այս հեռախոսազրույցի վերաբերյալ նշել էր, որ զրուցակիցները քննարկել են հայ-իրանական հարաբերությունների օրակարգային թեմաներին վերաբերող հարցեր, անդրադարձ է կատարվել երկկողմ պայմանավորվածությունների իրականացման ընթացքին:
«Մտքեր են փոխանակվել 3+3 տարածաշրջանային հարթակի վերաբերյալ, կողմերն օգտակար են համարել Թեհրանում կայացած հանդիպումը»,- ասված էր հաղորդագրությունում։
Իսկ իրանական կողմի տարածած հաղորդագրությունն ավելի սուր բնույթ էր կրում։ Դրա համաձայն՝ Ռաիսին մասնավորապես ասել էր, որ իր երկրի քաղաքականությունը կովկասյան տարածաշրջանի նկատմամբ մնում է անփոփոխ՝ Թեհրանը սատարում է այդ տարածաշրջանի հետ կապի ուղիների բացմանն ուղղված ցանկացած միջոց՝ հավատարիմ մնալով բոլոր երկրների ազգային ինքնիշխանությունը և տարածքային ամբողջականությունը հարգելու սկզբունքին։
Մեկնաբանելով երկու երկրների, ինչպես նաև՝ տարածաշրջանային երկրների միջև ճանապարհային և երկաթուղային կապուղիների զարգացման հայկական ծրագիրը՝ Իրանի նախագահը հայտարարել էր, որ Իրանը սատարում է ցանկացած նման ծրագրի, որը նա որակել է՝ որպես խաղաղության ամրապնդման և հարևան երկրների շահերի պաշտպանության արդյունավետ քայլ։
Ռաիսին Կովկասն անվանել էր առանցքային տարածաշրջան, որտեղ պետք է խաղաղություն և հանգստություն հաստատվի՝ ասելով, որ Իսլամական Հանրապետության քաղաքականությունն այդ տարածաշրջանի նկատմամբ անփոփոխ է։
Նա նաև զգուշացրել էր Փաշինյանին, որ պետք է թույլ չտալ, որ Կովկասը վերածվի արտատարածաշրջանային երկրների մրցակցության դաշտի` ընդգծելով, որ Կովկասի հետ կապված հարցերը պետք է լուծեն տարածաշրջանի երկրները և հեռու արտաքին միջամտությունից:
Դատելով իրանական կողմի վերջին հայտարարություններից՝ իրանական կողմը ջանքեր է ներդնում, որպեսզի Հայաստան-Ադրբեջան խաղաղության համաձայնագիրը ստորագրվի ոչ թե արևմտյան որևէ մայրաքաղաքում կամ հարթակում, այլ հենց ռեգիոնալ հարթակում։
Հիշեցնենք, որ նախօրեին Սանկտ Պետերբուրգում ԱՊՀ շրջանակում կայացավ Փաշինյան-Ալիև հանդիպում։ ՌԴ նախագահի խոսնակ Դմիտրի Պեսկովն էլ ասել էր, թե Հայաստանի ու Ադրբեջանի ղեկավարները պատրաստ են ավարտին հասցնել խաղաղ բանակցությունները՝ դուրս գալով միասնական պայմանագրի շուրջ պայմանավորվածության։
