Իրանը չի բացառում Իսրայելի դեմ այլ ճակատներ բացելու հավանականությունը
Իրանի արտաքին գործերի նախարար Հոսեյն Ամիր Աբդոլլահիանը հայտարարել է, որ հաշվի առնելով «Գազայում պատերազմական հանցագործությունները», հնարավոր է Իսրայելի դեմ պայքարի այլ ճակատների բացումը։ Այս մասին Ամիր Աբդոլլահիանը հայտնել է Բեյրութում Al Mayadeen հեռուստաալիքին տված հարցազրույցում։
«Շարունակվող ագրեսիայի և ռազմական հանցագործությունների, ինչպես նաև Գազայի շրջափակման լույսի ներքո գոյություն ունի նոր ճակատներ բացելու հնարավորություն», – ընդգծել է նախարարը։
Իրանի ԱԳՆ ղեկավարի խոսքով՝ իսլամական պետությունները «չպետք է հանդուրժեն այն հանցագործությունները, որոնք կատարում է Իսրայելը»։ Իրանի նախարարը «խաղաղ բնակչությանը ջրից և էլեկտրականությունից զրկելը, ինչպես նաև Գազայի բնակելի թաղամասերի շարունակական ռմբակոծումը» համարել է ռազմական հանցագործություն։
Աբդոլլահիանը հավելել է, որ Իրանը «շարունակում է քաղաքական և տեղեկատվական աջակցություն ցուցաբերել պաղեստինյան դիմադրությանը»։ Նա ընդգծել է, որ Իրանի և Սաուդյան Արաբիայի միջև «կա համակարգում Պաղեստինի աջակցության ընդհանուր ռազմավարության շրջանակներում»:
Լիբանան այցելելուց առաջ Ամիր Աբդոլլահիանը եղել էր Իրաքում, այնուհետև նա կմեկնի Սիրիա։ Իրանի արտգործնախարարը տարածաշրջանային շրջագայություն է սկսել՝ քննարկելու Իսրայելի և ՀԱՄԱՍ-ի միջև ընթացող ռազմական գործողությունները։
Հոկտեմբերի 7-ին ՀԱՄԱՍ-ի ավելի քան 1500 զինյալներ ճեղքել էին անվտանգության պատնեշը և Գազայի հատվածից ներխուժել Իսրայել։ Իսրայելում զոհերի թիվը հասել է 1300-ի։ 150 մարդ պատանդ է վերցվել։ Իսրայելը պատերազմ է հայտարարել ՀԱՄԱՍ-ին և հարվածներ է հասցնում հարյուրավոր թիրախների։ Գազայի հատվածում զոհերի թիվը հասել է 1400-ի։ Իսրայելը նաև Գազայի լիակատար պաշարում է սկսել՝ դադարեցնելով ջրի, էլեկտրաէներգիայի, վառելիքի, սննդի և այլ ապրանքների մուտքը։
