«Ադրբեջանական կողմը երբեք թույլ չի տա բեռ հասցնենք Արցախ… «կվալտը» պիտի դրանց գլխին պահես, որ թույլ տան ապրես». Արգամ Հովսեփյան
Հուլիսի 26-19 բեռնատար հումանիտար բեռներով Սյունիքի մարզի Կոռնիձոր գյուղի վարչական տարածքում են, սպասում են, որպեսզի կարողանան բեռը հասցնել ադրբեջանական շրջափակման մեջ գտնվող Արցախի Հանրապետություն։ Մինչև այս պահը Ադրբեջանն արգելում է բեռների տեղափոխումը՝ մատանցույց անելով Աղդամ-Ստեփանակերտ ճանապարհը։
ՀՀ-ում հավատարմագրված օտարերկրյա դիվանագետները, հասարակական կազմակերպության ներկայացուցիչներն արդեն այցելել են Կոռնիձորի այդ հատված, տեսել են իրավիճակը, սակայն որևէ կերպ չեն կարողացել փոխել իրավիճակը։
168.am-ի հետ զրույցում Տեղ համայնքի ավագանու «Ապրելու երկիր» խմբակցության ղեկավար, Արավուսի նախկին գյուղապետ Արգամ Հովսեփյանն ասաց՝ չպետք է հուսալ, որ Ադրբեջանը թույլ կտա, որպեսզի հումանիտար բեռը հասնի Արցախ։
«Ադրբեջանական կողմը երբեք թույլ չի տա, մինչև մենք ուժ չգործադրենք։ Այդ ո՞վ է ասել, որ Ադրբեջանը թույլ կտա, որ բեռ հասցնենք մեր հայրենակիցներին, դա կարող է լինել միայն ու միայն ուժով։ Չեմ հասկանում՝ թշամին մեր հարյուր տարվա թշնամին է, նո՞ր ենք սկսում ճանաչել, «կվալտը» պիտի դրանց գլխին պահես, որ թույլ տան ապրես։
21-րդ դարում թուրքն ավելի հայատյաց է դարձել, տեսեք, թե ինչ է կատարվել, արդեն 8 ամիս է՝ բլոկադայի մեջ է պահում 120 հազար խաղաղ բնակչի, սա 21-րդ դարի բա՞ն է։ Ո՞վ է տեսել՝ 21-րդ դարում սովամահ անեն բնակչությանը»,- նշեց Արգամ Հովսեփյանը։
Հարցին՝ չի՞ վախենում, որ իրեն կմեղադրեն պատերազմ հրահրելու մեջ, Արգամ Հովսեփյանը պատասխանեց.
«Ինչի՞ համար պետք է մեղադրեն, որ ուզում եմ իմ հայրենիքը պաշտպանե՞մ, մեր 120 հազար հայրենակից սովամահ է լինում, 30 հազար երեխա հաց չունի, պատկերացրեք։ Կներեք, բայց Երևանում դեռ չեն պատկերացնում, թե ինչ է կատարվում, գիտեն թե միայն սրճարաններն են, գնան սուրճ խմեն, գան տանը քնեն։ Հիմա Արցախն է, հետո Սյունիքն է լինելու, իսկ հետո հերթը հասնելու է Երևանին»։
Խոսելով Աղդամ-Ստեփանակերտ ճանապարհի մասին, Արգամ Հովսեփյանը նկատեց՝ առհասարակ նման խոսակցությունների մեջ մտնողները գիտե՞ն, թե ինչ ճանապարհ է այն։
«Թող նայեն աշխարհագրությունը՝ Որոտան, Ջրական, Ֆիզուլի, հետո Հադրութի տրասայով գնում է, աջ կողմում Բաքվի տրասան է, ձախով մտնում է Աղդամ։ Ադրբեջանական կողմն այդ ճանապարհն առաջարկելուց, գլուխը պատին է տալիս։ Ասեմ՝ այդ ճանապարհից չեն օգտվելու, իսկ եթե սկսեցին օգտվել, ուրեմն՝ արդեն անիմաստ է ապրել Հայաստանում, առհասարակ մեր հայ կոչվելն էլ է անիմաստ»,- ընդգծեց նա։
Ինչ վերաբերում է Տեղ համայնքի տարածք ներխուժած ադրբեջանական զինված ուժերի ներկայացուցիչներին, Արգամ Հովսեփյանն ասաց, որ նրանք շարունակում են մնալ նույն տեղում, այս պահին սադրանքի չեն դիմել։