«Ժամանակների կապը». Երևանում երիտասարդ խորեոգրաֆների երեկո կանցկացվի
Պարի ռեժիսուրա ուսումնական ծրագրի ուսանողների համար ինքնուրույն բեմադրություններ իրականացնելու պայմաններ ստեղծելու նպատակով հուլիսի 24-ին «Առնո Բաբաջանյան» համերգասրահում տեղի կունենա «Ժամանակների կապը» երիտասարդ խորեոգրաֆների երեկոն:
Ծրագիրը կնպաստի հաջորդ սերնդի խորեոգրաֆների ձևավորմանը. որոնք կապահովեն հայկական մտքի և գաղափարների արտացոլումը բալետում և առանձնահատուկ խորեոգրաֆիկ մտքի դիմապատկերով կդառնան համաշխարհային բալետային ընտանիքի լիիրավ անդամ:
«Պարարվեստի զարգացման հիմնախնդիրներից է ոչ միայն ավանդույթների պահպանումը, այլև միջավայրի ստեղծումը, որը կզարգացնի պարարվեստը որպես ժամանակակից արտահայտման ձև ու կձևավորի հայկական խորեոգրաֆիկ մտքի ուրույն դիմապատկերը:
Բալետային արվեստում բեմադրական մտքի զարգացման, ձևավորման և կայացման երաշխավորը խորեոգրաֆն է՝ իր գաղափարներով և էմոցիոնալ շարքով»,-ասվում է հաղորդագրության տեքստում:
Երեկոն հիմնված է Արամ Սաթյանի երաժշտության վրա: Բեմանկարիչ՝ Արեգ Միրիջանյան:
«Ժամանակների կապը» երիտասարդ խորեոգրաֆների երեկոն «Բալետ 2021» զարգացման հիմնադրամի գեղարվեստական ղեկավար և հիմնադիր, Երևանի թատրոնի և կինոյի պետական ինստիտուտի խորեոգրաֆիայի ամբիոնի դասախոս, ՀՀ ժողովրդական արտիստ Ռուդոլֆ Խառատյանի նախաձեռնությունն է: Այն իրականացվում է Երևանի Թատրոնի և կինոյի պետական իստիտուտի հետ համատեղ:
