Սալիվանը հայտարարել է, որ ԱՄՆ-ը պատրաստ է «հացահատիկային գործարքի» ցանկացած սցենարի
Սպիտակ տան ազգային անվտանգության հարցերով խորհրդական Ջեյք Սալիվանը CBS հեռուստաալիքի հետ հարցազրույցում հայտարարել է, որ ԱՄՆ-ը պատրաստ է զարգացումների «ցանկացած սցենարի»՝ կապված «հացահատիկի գործարքի» հետ։
Նրա կարծիքով, «սևծովյան նախաձեռնությունից» Ռուսաստանի հրաժարումն ապագայում նրա վրա կարժենա «հսկայական դիվանագիտական կորուստներ»։
«Եթե նրանք իսկապես հրաժարվեն դրանից, մնացած աշխարհը կնայի դրան և կասի, որ Ռուսաստանը երես է թեքել ամբողջ Հարավի, Աֆրիկայի, Լատինական Ամերիկայի և Ասիայի երկրներին անհրաժեշտ պարենը մատչելի գներով ստանալն ապահովելու հնարավորությունից: Եվ ես կարծում եմ, որ դա ապագայում Ռուսաստանի վրա կնստի դիվանագիտական հսկայական կորուստներ։ Այսպիսով, սա ընտրություն է, որը պետք է կատարի Վլադիմիր Պուտինը: Մենք պատրաստ ենք ցանկացած սցենարի և սերտորեն աշխատում ենք ուկրաինացիների հետ այս հարցում»,- ասել է Ջեյք Սալիվանը։
Ավելի վաղ ՌԴ նախագահ Վլադիմիր Պուտինը Հարավային Աֆրիկայի նախագահ Սիրիլ Ռամաֆոսային ասել էր, որ Ռուսաստան-ՄԱԿ համապատասխան հուշագրով նախատեսված պարտավորությունները՝ վերացնելու ռուսական սննդամթերքի և պարարտանյութերի արտահանման խոչընդոտները, դեռևս կատարված չեն։ Ավելին, գործարքի հիմնական նպատակը, այն է՝ հացահատիկի մատակարարումը կարիքավոր երկրներին, այդ թվում՝ աֆրիկյան մայրցամաքի, այդպես էլ չի իրականացվել։
Միևնույն ժամանակ, Թուրքիայի նախագահ Ռեջեփ Թայիփ Էրդողանը հայտարարել է, որ Անկարան և Մոսկվան նույն կարծիքին են «հացահատիկի գործարքի» երկարաձգման հարցում, իսկ ՌԴ նախագահի մամուլի քարտուղար Դմիտրի Պեսկովը ՌԻԱ Նովոստիին ասել է, որ Մոսկվան ոչինչ չի ասել հացահատիկի գործարքի երկարաձգման մասին։
