Հետևելու ենք պաշտոնական ընթացակարգերին. առայժմ այլ մեկնաբանություն չի լինելու. Արցախի նախագահի խոսնակ
Հունիսի 20-ին խորհրդարանում Նիկոլ Փաշինյանը 44-օրյա պատերազմի հանգամանքները քննող հանձնաժողովում ներկայացրեց, թե ինչու է հայկական կողմը պարտվել պատերազմում, և այդ պարտությունը կանխելու համար ինչ է փորձել անել ինքն ու իր գլխավորած իշխանությունը։
Նիկոլ Փաշինյանը ելույթի ավարտին պատրաստակամություն հայտնեց հրապարակավ պատասխանել նաև նիստին ներկա պատգամավորների բոլոր հարցերին, իհարկե, դրանց հրապարակայնությունը թողնելով թույլատրելիության սահմաններում: Ի վերջո, հանձնաժողովի նախագահ Անդրանիկ Քոչարյանը հայտարարեց, որ հարցուպատասխանին կանդրադառնան մեկ այլ օր՝ հունիսի 27-ին։
Նիստի ավարտից հետո 44-օրյա պատերազմի հանգամանքներն ուսումնասիրող քննիչ հանձնաժողովի նախագահ Անդրանիկ Քոչարյանը լրագրողների հետ ճեպազրույցում ասաց, որ պատրաստվում են հանձնաժողով հրավիրել նաև Արցախի Հանրապետության նախագահ Արայիկ Հարությունյանին:
«Նիկոլ Փաշինյանից հետո կրկին կարևոր պաշտոնյաներ պետք է գան, կարող եմ ասել՝ Արցախի նախագահին ենք պատրաստվում հրավիրել հանձնաժողով։ Պաշտպանության բանակի հրամանատարի հրավերը պարզապես փոխեցինք, կուզեի, որ Ջալալ Հարությունյանը գար մի քիչ ավելի ուշ»,- ասել էր Անդրանիկ Քոչարյանը։
168.am-ը Արցախի Հանրապետության նախագահ Արայիկ Հարությունյանի մամուլի խոսնակ Լուսինե Ավանեսյանից հետաքրքրվեց՝ Արցախի նախագահը որևէ ասելիք ունի՞ հանձնաժողովին, և հրավերն ընդունելուց հետո ի՞նչ ձևաչափով է լինելու մասնակցությունը, քանի որ Արցախի ճանապարհն Ադրբեջանի կողմից փակ է։
Հարցերին Լուսինե Ավանեսյանը հակիրճ պատասխանեց.
«Տվյալ հարցում հետևելու ենք պաշտոնական ընթացակարգերին, առայժմ այլ մեկնաբանություն չի լինելու»։
