ՀԱՀ-ի և Լեհաստանի միջև դիվանագիտական սկանդալ է ծագել Ռամաֆոսայի պահապան ծառայության պատճառով
Դիվանագիտական սկանդալ է բորբոքվել Հարավաֆրիկյան Հանրապետության (ՀԱՀ) և Լեհաստանի միջև: ՀԱՀ-ի South African Airways ազգային ավիաընկերության չարթերային ինքնաթիռում գտնվող մի խումբ լրագրողների և անվտանգության աշխատակիցների թույլ չեն տվել իջնել օդանավից:
Ինչպես տեղեկանում ենք ՀԱՀ-ի SABC պետական լրատվամիջոցի հրապարակումից, լրագրողներին թույլ են տվել ինքնաթիռից իջնել Լեհաստանի օդանավակայանում գրեթե 24 ժամ մնալուց հետո:
ՀԱՀ-ի նախագահի անվտանգության ծառայության ղեկավարն ավելի վաղ հայտնել էր, որ Լեհաստանի կառավարությունը «ցանկանում է վտանգի ենթարկել նախագահի անվտանգությունը»: Լեհական կողմի գործողությունների պատճառով ՀԱՀ-ի նախագահը գնացքով Ուկրաինայի տարածք է ժամանել անվտանգության աշխատակիցների փոքր խմբով։
Իսկ Լեհաստանի իշխանությունները նշել են, որ ժամանող օդանավը և նրա ուղևորները չեն ունեցել որոշ փաստաթղթերի բնօրինակները, այլ միայն պատճեններ: Բացի այդ, սահմանապահների մոտ հարցեր են առաջացել ինքնաթիռում գտնվող զենքի և տեխնիկայի վերաբերյալ։
Այժմ լրագրողները և անվտանգության ուժերի գրեթե 100 անդամները կմեկնեն Ժեշուվ, ուր երեկոյան կմեկնի նաև Ռամաֆոսան՝ նախքան Սանկտ Պետերբուրգ մեկնելը:
Հարավաֆրիկյան Հանրապետության, Սենեգալի, Զամբիայի և Կոմորյան Կղզիների նախագահները, Եգիպտոսի վարչապետը և Ուգանդայի արտաքին գործերի նախարարը ժամանել են Կիև` հակամարտության կարգավորման ուղիներ առաջարկելու: Իսկ հունիսի 17-ին աֆրիկյան պատվիրակությունը Սանկտ Պետերբուրգում կհանդիպի ՌԴ նախագահ Վլադիմիր Պուտինի հետ:
