Կորոնավիրուսի նոր տարատեսակի ալիքը Ռուսաստանում սպասվում է մայիսի վերջին
Կորոնավիրուսի նոր տարատեսակի`«Արկտուրուս»-ի ալիքը Ռուսաստանում սպասվում է մայիսի վերջին: Այս մասին հայտնել է «Ռոսպոտրեբնադզոր»-ի ղեկավար Աննա Պոպովան։
«Մենք (հիվանդության) հետագա աճի ռիսկեր ենք տեսնում մինչև մայիսի վերջը, քանի որ սկսվելու է արձակուրդների շրջանը: Եվ այդ բռնկումը կարող է լինել», – մեջբերում է «Интерфакс»-ը Պոպովայի խոսքերը Սարատովում կայացած ճեպազրույցից:
Նրա խոսքով՝ այսօրվա դրությամբ Ռուսաստանում կա «Արկտուրուս»-ի չորս հաստատված դեպք։
«Ոչինչ անսպասելի չէ: Սա նոր գենոտարբերակ է, արդեն հայտնի «օմիկրոնի» նոր մուտացիա այս տարատեսակի ներսում: Ընթանում է վիրուսի հետագա զարգացում: Առայժմ վիրուսը գերակշռող է Հնդկաստանում`այս երկրի համար առաջացնելով նոր, բավականին ինտենսիվ ալիք: Եվ այսօր այնտեղ նոր հիվանդացածների գրեթե 90%-ը «Արկտուրուս»-ով վարակված մարդիկ են», – նշել է Պոպովան։
«Դրա առանձնահատկություններից (դրանք արդեն նկարագրվել են, և այս վիրուսը վերջերս է հայտնվել) մեկը շատ բարձր վարակելիությունն է, այն նույնիսկ ավելի վարակիչ է, քան դրա բոլոր նախորդները: Ցանկացած փոքր շփում հանգեցնում է ախտահարման և, ամենայն հավանականությամբ, հիվանդության զարգացման», – պարզաբանել է «Ռոսպոտրեբնադզոր»-ի ղեկավարը:
Միևնույն ժամանակ, նրա խոսքով, Հնդկաստանի և այն երկրների գործընկերները, որտեղ ի հայտ են գալիս «Արկտուրուս»-ի եզակի դեպքեր, դեռևս չեն նկարագրել հիվանդության ավելի ծանր ընթացք, քան «օմիկրոնի» դեպքում։
Պոպովան նշել է «Արկտուրուս»-ի մեկ այլ հատկանիշ. արտասահմանցի գիտնականների տվյալներով՝ այն կարողանում է «շրջանցել» ավելի վաղ ձևավորված իմունիտետը։
«Բայց մենք պատրաստ ենք, Ռուսաստանի Դաշնության առողջապահական ողջ համակարգը պատրաստ է լրացուցիչ լարվածության և ծանրաբեռնվածության», – եզրափակել է Պոպովան:
