«Անկեղծ չգիտեմ՝ ինչ պատասխանեմ ձեր հարցին» Ալեն Սիմոնյանը՝ ՌԴ նախագահի հնարավոր ձերբակալության մասին
ԱԺ նախագահ Ալեն Սիմոնյանն այսօր խորհրդարանում լրագրողների հետ զրույցում անդրադարձավ Հաագայի միջազգային դատարանի ընդունած՝ ՌԴ նախագահ Վլադիմիր Պուտինին ձերբակալելու համար միջազգային օրդեր տալու վերաբերյալ որոշմանը և այդ համատեքստում՝ Հայաստանի Սահմանադրական դատարանում՝ Հռոմի ստատուտի սահմանադրականության հարցի քննությանը:
«Այդ համաձայնագրի վավերացումը մենք սկսել ենք 2-3 ամիս առաջ, գործընթացը մենք շուտ ենք սկսել՝ մինչև Հաագայի դատարանի այս որոշումը։ Հայաստանին այդ որոշումը պետք է և պետք է այդ համաձայնագրին միանալը։
Ինչ վերաբերում է ՍԴ որոշմանը, ապա չեմ կարող կանխատեսել, թե դատարանն ինչ որոշում կկայացնի, դրանով նաև կպարտադրեմ կամ իմ քաղաքական դիրքորոշումը կարտահայտեմ, հետո ասեն՝ ԱԺ նախագահն ասաց, դրա համար…»,- նշեց Ալեն Սիմոնյանը։
Հարցին՝ եթե ՀՀ ԱԺ-ն համաձայնագիրը վավերացնի, և ՌԴ նախագահը ԵԱՏՄ կամ ՀԱՊԿ նիստերից մեկի շրջանակներում գա Հայաստան՝ ՀՀ քաղաքական ղեկավարությունն ի՞նչ գործողություններ կանի։
«Գիտեք ինչ, ճիշտն ասած՝ ինձ համար էլ է զարմանալի, եկեք վերանանք Հայաստանից, որևէ երկիր, որն արդեն իսկ վավերացրել է, դժվար եմ պատկերացնում, որ, ենթադրենք, ինչ-որ համաժողովի, որին տարբեր երկրների նախագահներ են մասնակցում… ես ուղղակի պրակտիկայում չեմ պատկերացնում՝ ինչպիսի գործողություններ պիտի անի երկիրը, անկեղծ չգիտեմ, չգիտեմ՝ ինչ պատասխանեմ ձեր հարցին»,- շեշտեց Ալեն Սիմոնյանը։
Մանրամասները՝ 168.am-ի տեսանյութում
