Ունենալու ենք և՛ լավ հետազոտական համալսարան, և՛ Գիտությունների ակադեմիայի կյանքը կերկարի․ Ատոմ Մխիթարյան
Փետրվարի 14-ին ՀՀ Գիտությունների ազգային ակադեմիայում տեղի է ունեցել քննարկում` նվիրված ՀՀ ԳԱԱ Գիտակրթական միջազգային կենտրոնի հենքի վրա հետազոտական համալսարանի ստեղծմանը: Քննարկմանը մասնակցել են ՀՀ ԳԱԱ նախագահության անդամներ, ՀՀ ԳԱԱ գիտահետազոտական ինստիտուտների տնօրեններ, ՀՀ ԳԱԱ Գիտակրթական միջազգային կենտրոնի ղեկավարությունը, ամբիոնների վարիչներ:
«Մենք ունենք մտադրություն՝ Գիտակրթական միջազգային կենտրոնի հենքի վրա ստեղծել հետազոտական համալսարան, որը փորձենք զարգացնել և ներգրավել միջազգային ցանցերի մեջ»,- ասել է ՀՀ ԳԱԱ նախագահ, ակադեմիկոս Աշոտ Սաղյանը:
ՀՀ ԳԱԱ Զարգացման ծրագրերի և մշտադիտարկման վարչության գիտական կադրերի պատրաստման ծրագրերի պատասխանատու Սամվել Կարաբեկյանն էլ ներկայացրել է հետազոտական համալսարանի ստեղծման նպատակները և քայլերը: Ըստ նրա՝ հետազոտական համալսարանի ստեղծման հիմնական նպատակն է բնագիտական, տեխնոլոգիական, հումանիտար և հասարակագիտական ուղղություններով արդիական գիտական հետազոտություններ կատարելու ունակ, ստեղծագործական-նորարարական մտածելակերպ ունեցող բարձրակարգ մասնագետներ պատրաստելը՝ հաշվի առնելով միջազգային պահանջարկը:
Որոշվել է ստեղծել աշխատանքային խումբ, որը կշարունակի հետազոտական համալսարանի մոդելի ստեղծմանն ուղղված աշխատանքները՝ հաշվի առնելով հնչած կարծիքներն ու առաջարկները:
Կրթության փորձագետ Ատոմ Մխիթարյանի կարծիքով՝ սա կարևոր քայլ է։
«Ինչպես հասկացա քննարկումից՝ սա Գիտությունների ազգային ակադեմիան պահելու միակ ձևն է, որովհետև հակառակ դեպքում ուզում են ԳԱԱ կազմում գտնվող 30-ից ավելի գիտահետազոտական ինստիտուտ տանել, միացնել բուհերին։ Հիմա, եթե Ակադեմիան ունենում է հետազոտական համալսարան, ընդ որում, արդեն կա Գիտակրթական միջազգային կենտրոնը, որտեղ մագիստրոսներ և ասպիրանտներ են պատրաստում, ստացվում է, որ գիտությունն ու բարձրագույն կրթությունը միասին գործում են։ Կարծում եմ՝ լավ արդյունքներ հնարավոր կլինի գրանցել, որովհետև լավագույն համալսարանների թվում դասվելու համար հետազոտության բաղադրիչը պետք է մեծ լինի։ Գիտահետազոտական ինստիտուտներում արդեն կա այդ բաղադրիչը և, եթե մի քիչ էլ կրթական բաժինն ուժեղանա, կստացվի, որ ունենալու ենք և՛ լավ հետազոտական համալսարան, և՛ Գիտությունների ակադեմիայի կյանքը կերկարի»,- 168.am-ի հետ զրույցում ասաց Ատոմ Մխիթարյանը։
Մեր տեղեկություններով՝ կազմվելու է հանձնաժողով, որտեղ հավանաբար ընդգրկված կլինի ԿԳՄՍ նախարարության ներկայացուցիչը, կամ գոնե կտեղեկանան, թե ինչ ընթացք կունենան քննարկումները։ Նախարարության վերաբերմունքը բացասական չէ։
