Արցախի պողոտայում բռնկված հրդեհը մարվել է
Հունվարի 29-ին, ժամը 13:41-ին Ճգնաժամային կառավարման ազգային կենտրոն ահազանգ է ստացվել, որ ծուխ է նկատվում Երևանի Արցախի պողոտայի թիվ 42 հասցեի մոտակայքում՝ ավտոպահեստամասերի շուկայի պահեստում: Այս մասին հայտնում են ՀՀ ներքին գործերի նախարարության փրկարար ծառայությունից։
Հրդեհի բարդության «1 ԲԻՍ» կանչով դեպքի վայր են մեկնել ՆԳՆ ՓԾ Երևան քաղաքի փրկարարական վարչության հրշեջ-փրկարարական ջոկատներից չորս մարտական հաշվարկ, մեկ ջրատար, Հրդեհաշիջման և փրկարարական աշխատանքների կազմակերպման բաժնի հերթապահ, Ճգնաժամային կառավարման ազգային կենտրոնի օպերատիվ և Բժշկական ապահովման վարչության հերթապահ խմբերը, Հոգեբանական աջակցության բաժնի հերթապահ հոգեբանը:
Հրդեհը մեկուսացվել է ժամը 14։39-ին, մարվել՝ 15:36-ին: Պահեստում (300 քմ) այրվել է շինանյութ։ Տուժածներ չկան։
Դեպքի վայրում են գտնվել ՆԳՆ Փրկարար ծառայության տնօրեն-նախարարի տեղակալ, փ/ծ գնդապետ Կ. Ցուցուլյանը, տնօրենի տեղակալ, փ/ծ գնդապետ Տ. Պետրոսյանը:
