Վետերանների միությունը կկրի մարշալ Բաղրամյանի անունը
Հայաստանի վետերանների միությունը այսուհետ կկրի Խորհրդային նշանավոր հրամանատար, Հայրենական մեծ պատերազմի բանակների և ճակատների հրամանատար, Խորհրդային Միության կրկնակի հերոս, մարշալ Հովհաննես Քրիստափորի Բաղրամյանի անունը:
Վետերանների միությունում անցկացվեց Հովհաննես Բաղրամյանի ծննդյան 125-ամյակին նվիրված միջոցառում, որին ներկա էին լեգենդար հրամանատարի հարազատները, պաշտպանության նախարարության, դիվանագիտական առաքելությունների ներկայացուցիչներ, վետերանների շարժման առաջնորդներ և այլք: Միջոցառմանը մասնակցել է նաև Հովհաննես Բաղրամյանի թոռը՝ Իվան Բաղրամյանը:
Միջոցառման ընթացքում բացվեց հուշատախտակ, որի համաձայն Վետերանների միությունն այսուհետ կրելու է Հովհաննես Բաղրամյանի անունը:
«Մոսկվայի տուն» մշակութագործարարական կենտրոնի ղեկավար Վահրամ Կարապետյանը նշեց, որ նման միջոցառումները մարդկանց մեջ հայրենասիրությունն ավելացնելու լավ օրինակ են: Նրա համոզմամբ՝ մարշալ Հովհաննես Քրիստափորի Բաղրամյանը երիտասարդների հայրենասիրական դաստիարակության խորհրդանիշ է:
«Մարշալ Հովհաննես Քրիստափորի Բաղրամյանը յուրաքանչյուր պետության անվտանգության խորհրդանիշն է: Անգնահատելի է երկրի անվտանգության մեջ նրա ներդրումը: Ուրախ ենք այս միջոցառման մի մասը լինելու համար: Մենք ապագայում էլ հանձն ենք առնում լինել հերոսների կողքին, ինչը նպաստում է Ռուսաստանի և Հայաստանի միջև երկկողմ հարաբերությունների լավացմանը»,- նշեց նա:
Հայրենական մեծ պատերազմի վետերան Ռոզալիա Աբգարյանը շեշտեց՝ հպարտ են, որ այսօրվանից Հայաստանի վետերանների միությունը կրելու է մարշալ Հովհաննես Քրիստափորի Բաղրամյանի անունը:
«Մենք չենք մոռացել և ոչ մի անգամ չենք մոռանա, այն գործերը, որոնք իրագործել է մեր հայրենակից մարշալ Հովհաննես Քրիստափորի Բաղրամյանը: Ուրախ ենք, որ այսուհետ Հայաստանի վետերանների միությունը կրելու է նրա անունը»,- եզրափակեց նա:
Մարշալ Բաղրամյանը յուրահատուկ ու հարուստ կենսագրության է ունեցել՝ լի վերելքներով ու վայրէջքներով, անհավանական հաջողություններով և ճակատագրի ողբերգական շրջադարձերով։ Նրան վիճակված էր մասնակցելու Հայրենական մեծ պատերազմի առաջին ամիսների ամենաարյունալի մարտերին, որտեղ կարողացել է հզոր դիմադրություն կազմակերպել՝ ճնշելով հակառակորդին։
Նացիստների դեմ Բաղրամյանի իրականացրած բազմաթիվ ռազմական գործողություններ մինչ օրս մանրակրկիտ ուսումնասիրվում են աշխարհի բոլոր ռազմական ակադեմիաներում: «Բագրատիոն» գործողությունը հավերժ կմնա օրինակ և կրկնօրինակման առարկա: Մերձբալթյան երկրների ազատագրումը, չորս օրում Քյոնիգսբերգի անառիկ ամրոցի գրավումը մարշալ Բաղրամյանի ծրագրած և հաջողությամբ իրականացված ամենայուրահատուկ գործողություններն են։
Սակայն նրա ռազմական արվեստի գագաթն է համարվում «Անադիր» գործողությունը:
Անցնելով չորս պատերազմ՝ Առաջին աշխարհամարտից մինչև Քաղաքացիական պատերազմ, խորհրդա-ֆիննական պատերազմից մինչև Երկրորդ համաշխարհային պատերազմ, մարշալ Բաղրամյանն իր անունը ոսկե տառերով գրեց Խորհրդային Միության ժողովուրդների պատմության մեջ։
