Ոստիկանները թող իմանան՝ կարող է 80 տարեկան լինեն, մահճակալներից հանեն ու քրեական պատասխանատվության ենթարկեն իրենց թոռների ու ծոռների աչքի առաջ. Հայկ Ալումյան

«Հայրենի իշխանությունները շատ բաներ են անում, որոնց բացատրությունը հիմա հնարավոր չէ գտնել: Իրավաբանական տեսակետից ինձ համար դա անբացատրելի է: Որևէ բանական բացատրություն դրան գտնել չեն կարող: Իրական պատճառները ոչ թե իրավական դաշտում են, այլ քաղաքական: Միգուցե որոշ մարդիկ չեն ուզում՝ այդ արխիվները հետագայում դառնան հանրության համար հասանելի»,- 168.am-ի «Ռեվյու» հաղորդաշարի հերթական թողարկման ընթացքում ասաց փաստաբան Հայկ Ալումյանը՝ անդրադառնալով Ազգային ժողովի (ԱԱԾ) կողմից այսօր քննարկվող՝ ազգային անվտանգության ծառայության (ԱԱԾ) արխիվները ոչնչացնելու հնարավորության վերաբերյալ հարցին:

Նրա խոսքով՝ իրավական տեսանկյունից, ճշմարտությունը հետագայում գոնե սերունդների համար բացահայտելու առումով սա ուղիղ հակասում է հանրային շահին:

«Ինչ-որ մարդիկ, հավանաբար, ուզում են սրբագրել պատմությունը կամ թույլ չտալ, որ պատմության որոշ էջեր դառնան հանրության սեփականությունը»,- ասաց Հայկ Ալումյանը:

Անդրադառնալով սեպտեմբերի 21-ին Եռաբլուրում ոստիկանության կարմիրբերետավոր ջոկատայինների կողմից զոհված զինծառայողների ծնողների նկատմամբ բռնություն կիրառելու առնչությամբ հարուցված քրեական վարույթին, դրա ձգձգմանը, որոնց պատճառը, ըստ իրավապահների, կարմիրբերետավորներին նույնականացնելու խնդիրն է, փաստաբանն ուշադրություն հրավիրեց նոր Քրեական օրենսգրքի կարգավորումների վրա:

«Քրեական նոր օրենսգրքում ունենք մի կարգավորում, որ վաղեմություն չի տարածվում մի շարք հոդվածների, այդ թվում՝ խոշտանգում հոդվածի վրա: Դա 450 հոդվածն է: Հանցակազմի բնութագրում է՝ ուժեղ ֆիզիկական կամ հոգեկան տառապանք պատճառելը: Եթե քննությամբ պարզվի, որ այդ վայրագությունների արդյունքում զոհված երեխաների ծնողներին պատճառվել է հոգեկան տառապանք (իր երեխայի գերեզմանի կողքն այդ աստիճանի իրենց նվաստացնում են), ապա մեր ոստիկանները թող իմանան, որ իրենց այս գործողության վրա վաղեմություն չի տարածվում: Իրենք կարող է 80 տարեկան լինեն, հետո «եղանակ» փոխվի, որովհետև միշտ չէ այս «եղանակը» լինելու այստեղ, ու նրանց իրենց մահճակալներից հանեն ու ենթարկեն քրեական պատասխանատվության իրենց թողների ու ծոռների աչքի առաջ»,- ասաց Հայկ Ալումյանը:

Փաստաբանը նշեց՝ 450-րդ հոդվածը շատ ծանր հոդված է:

«Ես իրենց խորհուրդ կտամ կարդալ մի հատ, իսկ ավելի լավ է՝ մի քանի անգամ կարդան ու անգիր անեն, որովհետև մինչև 12 տարի ազատազրկում է նախատեսում: Ու թող լավ իմանան, որ իրենց չի օգնելու այն, որ իրենք հրաման են կատարել, որովհետև ակնհայտ ապօրինի հրաման կատարելը նրանց չի ազատելու պատասխանատվությունից»,– ասաց Հայկ Ալումյանը:

Անդրադառնալով Հայաստանի հանրապետական կուսակցության (ՀՀԿ) փոխնախագահ Արմեն Աշոտյանի՝ երկրից ելքը արգելելուն ու նրան, որ ոստիկանությունը հրաժարվել է մեզ տեղեկություն տրամադրել նրան մեղադրանք առաջադրելու հիմքերի, օրվա ու ժամի մասին այն պատճառաբանությամբ, թե դա անձնական տվյալ է, Հայկ Ալումյանն ասաց՝ այդ տրամաբանությամբ այսօր ԶԼՄ-ները ցանկացած բան, որ հրապարակում են, բացի եղանակը հանրապետությունում, փաստորեն կարող է դառնալ անձնական տվյալ:

«Երկու մեքենա բախվեցին, արդեն երկու անձ են, դա անձնական տվյալ է, մեկը պիկետ է անում, պիտի չասես, որովհետև անձնական տվյալ է: Այս ամենը պետք չէ հասցնել աբսուրդի: Անձնական տվյալներ են մինչև այն պահը, քանի դեռ չի դարձել հանրային քննարկման առարկա: Դրանից հետո ինքն արդեն անձնական տվյալ չէ ու չի պաշտպանվում: Սա ուղղակի պատրվակ է, որպեսզի ձեզ ուղղակի մի քիչ խոչընդոտեն, ու դա խելամիտ պատրվակ չէ»,- ասաց Հայկ Ալումյանը:

Մանրամասները՝ տեսանյութում