Կառավարական ամառանոցի մոտ ինքնահրկիզման փորձ կատարած քաղաքացին դեռ վերակենդանացման բաժանմունքում է
Կիրակի երեկոյան Կառավարական ամառանոցների մոտ ինքնահրկիզման փորձ կատարած 47-ամյա տղամարդը շարունակում է բուժում ստանալ Այրվածքաբանության ազգային կենտրոնում։
Ինչպես բուժհաստատությունից 168.am-ին փոխանցեցին՝ տղամարդը գտնվում է վերակենդանացման բաժանմունքում։
Փորձեցինք կապ հաստատել վերակենդանացման բաժանմունքի աշխատակցի հետ, սակայն մեր զանգերը մնացին անպատասխան։
Քաղաքացու առողջական վիճակի վերաբերյալ տեղեկություն ստանալու նպատակով 168.am-ը փորձեց կապ հաստատել նաև Առողջապահության նախարարության լրատվական ծառայության հետ, սակայն մեր զանգերին պատասխանող չեղավ։
Նշենք, որ քաղաքացու վիճակը երեկ ծանր էր գնահատվում։
Հիշեցնենք, որ նոյեմբերի 6-ին ժամը 21։30-ի սահմաններում Կառավարական ամառանոցների մոտ քաղաքացին ինքնահրկիզման փորձ էր կատարել։
168.am-ին հայտնի էր դարձել, որ քաղաքացին ազգությամբ եզդի, 47-ամյա Ա․ Ուսոյանն է։
Այրվածքաբանության կենտրոնի բակում նոյեմբերի 6-ի գիշերը 168.am-ը զրուցել էր Ուսոյանի հարազատների հետ, որոնք որոշ մանրամասներ էին փոխանցել։
«Իրենք օրվա աշխատավարձով ապրող ընտանիք են: Ա. Ուսոյանը մի մեքենա ունի, որով պլաստմասսե տարաներ, մետաղներ է հավաքում և հանձնում»,- պատմել էր հրկիզված տղամարդու հարազատներից մեկը:
Նրա խոսքով՝ երեկ առավոտյան սովորականի նման Ա. Ուսոյանն իր աշխատանքն է կատարել, Մյասնիկյան պողոտայով անցնելիս պարեկային ծառայության աշխատակիցները մոտեցել և տուգանել են նրան, իսկ ավտոմեքենան տեղափոխել են տուգանային հրապարակ.
«Ա.-ն ասել է՝ ի՞նչ եք անում, ես էս ավտոյով եմ գումար աշխատում, բայց ոչ մի բան, մեքենան այդպես՝ պլաստիկներով ու մետաղի կտորներով կիսաբեռնված՝ տեղափոխել են տուգանային հրապարակ»:
Ուսոյանի հարազատները նաև պատմել էին, որ տղամարդը 10.000 դրամ պարտք է ունեցել, ինչի պատճառով մեքենան տեղափոխել են Հալաբյան փողոցի վրա գտնվող հարկադիր ծառայությանը պատկանող տարածք:
Ավելի ուշ ԴԱՀԿ-ն պարզաբանում էր տարածել կատարվածի առնչությամբ, նշել, որ Ա․ Ուսոյանի նկատմամբ դեռևս 2013 թվականից Ծառայությունում առկա են տարբեր պահանջատերերի՝ ապահովագրական ընկերության, ՃՈ, համատիրություն, օգտին հարուցված կատարողական վարույթներ, ընդհանուր պարտավորությունը կազմում է ավելի քան 2 մլն դրամ։
«Կատարողական գործողությունները, այդ թվում նաև` ավտոմեքենայի նկատմամբ հետախուզում հայտարարելը, պայմանավորված է եղել հիշյալ պարտավորությունների հարկադիր կատարումն ապահովելու անհրաժեշտությամբ։ Ա․ Ուսոյանը տեղեկացված եղել է իր նկատմամբ հարուցված կատարողական վարույթների մասին»։
